Aruba awor ta acepta COVID19 test di aerolinea JetBlue pa biaha

NEW YORK – E aerolinea Mericano JetBlue a revela awe cu nan a bira socio cu Aruba pa por haci un COVID19 test pa nan pasaheronan prome cu nan yega Aruba. Aruba a bay di acuerdo pa acepta e tipo di test aki provee pa e compania Vault Health. Cu un resultado negativo, e pasahero di JetBlue por biaha pa Aruba y disfruta di su vacacion. Desde cu a habri frontera pa e.o. Merca, tur pasahero mester tin un resultado di test negativo sea prome cu e biaha (72 ora) of ora cu e yega. Y si e yega Aruba y haci e test, e mester a keda den cuarentena prome cu e por disfruta di su vacacion.   

TEST NA CAS

E tipo di test awor cu JetBlue ta ofrece ta uno cu e pasahero por haci na cas. Usando e servicio di Vault Health, e por upload e resultado mientras cu e ta yena su informacion pa su viahe pa Aruba. Claro cu pasaheronan di e aerolinea ta keda liber pa haci un otro test cu e isla (Aruba) ta aproba tambe. 

KI ORA MESTER HACI E TEST

E pasahero mester tuma e test un siman prome cu e biaha. E mester tuma e test mainta, dos dia prome cu nan mester e resultado. P.e Si e pasahero mester di e resultado diasabra, nan mester tuma e test diahuebs mainta. E test por yega pa diasabra y ta duna e informacion 48 ora despues. Pero e persona cu ta haci e test, no ta hacie su so. Via di un zoom call, un persona entrena ta testigua e proceso di coleccion di e prueba, pa asina esun cu ta haci e test, por hacie corecto.