Premier Wever biahando pa Hulanda awe pa ta den RMR diabierna

ORANJESTAD – Manera por a spera, diaranzon (awe) prome minister di Aruba Evelyn Wever Croes, ta biaha pa Hulanda pa ta presente den RMR (Conseho di Minister di Reino) pa trata e leynan di Reino cu Aruba lo forma parti di dje proximamente. Dialuna ainda e mandatario a bisa e portal aki cu e no tabata sa ainda, pero mescos cu prome minister di Corsou Eugene Rhuggenaath a haci luna pasa, sra Wever lo haci. E diferencia ta, segun e portal aki a compronde, sra Wever lo no bolbe Aruba cu secretario di estado Raymond Knops pa firma e siguiente dialuna. Por lo menos, esey no ta(bata) e intencion.

KEDA CLA

“Nos por bisa cu nos a yega na e punto cu gobierno di Aruba ta cla pa acepta e condicionan. Pa e motibo aki mi ta biahando pa Hulanda pa atende e reunion di conseho di minister di reino diabierna awor unda cu e topico aki lo ta riba agenda” Wever Croes a bisa. Segun e mandatario e ta kere cu e pakete cu ta riba mesa awor ta mas balancea, mas awor cu e autonomia di Aruba ta miho salvaguardia y cu e pakete lo yuda saca Aruba di tur e problemanan cu nos a wordo hinca aden door di COVID19.