Director nobo di hospital sorprendi di kehonan di sindicato ABV

ORANJESTAD – Director nobo di hospital Horacio Oduber drs Jacco Vroegop, no ta reconoce e declaracionnan di sindicato di trahadornan di hospital ABV di un dia prome. Den e conferencia ey un dia prome, e presidente di sindicato Gina Maduro a mustra den direccion di e director, cu e ta haciendo un reorganizacion no anuncia, ta buscando pa reduci personal, y no ta actua conforme CAO. Tur e puntonan aki drs Vroegop a atende durante su conferencia di prensa diaranzon mainta. 

REACCION

Den su prome reaccion pa e portal aki, e director medico nobo ta mustra cu ta puro coincidencia cu a tene un conferencia di prensa un dia despues di esun di e sindicato. Pa loke ta e kehonan expresa, dr Vroegop ta kere cu ta mal comunicacion entre nan y e sindicato a causa cierto declaracionnan cu e no ta reconoce. Segun e dr, ningun momento kier reduci personal. ‘Mas sigur ta buscando mas personal pasobra mester di mas hende” e director a sigui bisa. Conocemento di e CAO tambe ta na ordo, ya cu segun e, e tin un copia di e CAO riba su mesa y a repasa esaki sigur y a haci varios anotacion y no tin intencion pa viola esaki. Claro cu por tin cierto cambio mirando cu cos ta cambia cu tempo. Pero no ta cuestion cu e lo ta violando e CAO manera cu e sindicato ta pretende. E director a keda sorprendi cu e declaracionnan aki ya cu apenas un dia anterior, tabatin un bon comprondemento entre su persona y e sindicato. Despues di e reunion, nan a topa si y a sali bon for di esey. Lo tin semper cierto diferencianan di opinion pero esaki semper tin.  

E SINDICATO

Tabata diamars cu e sindicato a tene un conferencia di prensa unda cu e presidente di e sindicato Gina Maduro a trece varios preocupacion di e sindicato dilanti. Entre nan, cu e director nobo ta haciendo un reorganisacion cu no ta corecto y no tabata segun plan. Esey ta encera cu hende lo perde nan trabou tambe den e proceso. A bay specificamente riba algun caso unda cu un particular, sra Maduro ta relata cu e director nobo a practicamente persigui e trahado aki y a informe cu e no ta welcome mas den e departamento den cual e tabata traha, y cu e mester sea transferi pa otro departamento of bandona hospital. Ta trata di un trahado cu tabata malo pa 7 luna y cu recientemente a bolbe bek na pia di trabou. Segun sra Maduro, e forma con e director nobo a persigui e persona aki, no tabata corecto. Ademas e sindicalista a referi na e cantidad di avisonan pa clustermanager cu ta apareciendo den medionan di comunicacion y tambe e portal di e hospital, mientras cu ta bisa cu tin personal di mas y cu mester reduci esaki. Tambe a critica cu e forma di proceder di e director nobo, ta viola e Contracto Colectivo Laboral actual (CAO) y cu esey no ta permiti. Na tur, sra Maduro no tabatin ningun  tiki palabra bon pa e director y a vocifera esaki tambe durante e conferencia di prensa. 

E DIRECTOR

Manera ya indica, e director diaranson mainta a refuta mayoria, si no ta tur e acusacionan y a keda mas bien straña di tur e acusacionan y ta lamenta esaki pasobra e ta crea un ambiente cu no ta corecto den e hospital. Un pa un, e director a purba desbarata e kehonan y a mustra atrobe cu a atende esaki cu e sindicato y ta spera cu por conta cu nan pa bienestar di e hospital. E director ta na Aruba pa 2 luna y tin un contracto habri (esta pa tempo indefini) y ta mustra di ta cla pa e retonan cu tin su dilanti. Den un articulo adhunto, lo duna un bista mas amplio di e director y su plannan pa cu e hospital.