Yiu ta keha cu pa negligencia, su tata a bira morto #42 di COVID19

ORANJESTAD – Famia di e di 42 morto registra pa COVID19, ta considera e morto di nan tata pa motibo di negligencia y no COVID19. Asina e yiu homber di e defunto ta bisa noticiacla.com. Su tata ta esun cu tabata e morto #42 di COVID19 na Aruba, manera cu e portal aki a raporta ayera. E yiu homber di inicial C.C. ta considera cu ta mal trabou di tanto e asistente di docter como docter a pone cu awe su tata no tey mas. E tata (victima #42) a fayece dialuna anochi 8’or y como cu e tabata positivo pa COVID19, a registra su morto como e motibo. 

KICO A PASA

Segun e yiu homber, e tata a pidi ayudo pa dokter wak e. “Y toch e docter no a ni yega. El a yega pa djis constata morto di mi tata”, e yiu ta sigui bisa. E ta mustra tambe cu tin reclamo riba e number cu mester yama (#166), pero cu tur dokter ta traha entre 7’or di mainta pa 7’or di anochi. “Awor con ta para di 7or pa mas tempran?” e yiu ta puntra. Tambe CC ta mustra cu ora cu nan a yama 166, nan a wordo puntra dicon nan mes no ta yuda e tata (esta e yiu). Pero e yiu ta cuestiona esaki pasobra nan mes tabata den isolacion/cuarentena. Asina mes nan tabata kier, segun version di e yiu, pa busca e tata y hibe hospital. “Increibel mes” e yiu a sigui bisa.   

MOTIBO DI MORTO

E yiu ta sigui mustra tambe cu nan (DVG) no mester sigui bisa (cu) e hendenan ta muri di COVID19 sino mal trabou di asistent y di dokter. “Nan ta neglisha nos hende grandi (nan) y Dios sa cuanto famia a pasa manera mi tata a pasa aden”. E ta splica cu su tata, den menos di 1 siman di tin COVID19, y sin por a haya ayudo y trato, a fayece. E yiu ta admiti tambe cu e tata tabatin otro problemanan di salud caba. “Ya e tabata sinti curazon, pia tabata hincha y un par di cos mas. E la haci test y a sali positivo” e yiu ta sigui conta. “Pero dokter a laga hopi di desea. Ta conoci cu un pashent cu tin e simptomanan caba, ta mas vulnerable pa COVID19 y cu e chens ta grandi cu nan por bira victima. No obstante esaki, e yiu ta sinti cu si a duna mas atencion mas liher, por a evita e morto di e forma aki. 

ULTIMO DIANAN

E tata diadomingo a perde balansa y cay. “Y nan a dura 3 ora prome cu nan yega pa lante y pone riba cama bek. Y nan no a ni control’e, lugar e tabata bisa mi cu e tin dolor na su cabez” e yiu a sigui conta. “Ayera merdia (dialuna) el a bira mas pio, y bo ta yama 911 y nan ta bisa bo yama docter di cas of 166. Y ayera nochi (dialuna) 8’or ney, mi tata a fayece” e yiu ta sigui conta. “E hendenan ey no sa ki dolor ta pa perde un ser keri. Y pio un hende grandi nan ta laga nan muri”, e yiu a finaliza bisando. Su motibo di comparti e dolor inmenso aki, ta pa concientiza tur hende pa tene cuenta y evita cu e por sosode cu otronan tambe. Noticiacla ta manda palabra di condolencia na famia di e fayecido.