Gobierno a scucha varios grupo riba e ‘deal’ cu kier firma cu Hulanda

ORANJESTAD - Diamars merdia, Prome Minister Evelyn Wever-Croes hunto cu Minister di Finanza,  Xiomara Maduro y Minister di Husticia Andin Bikker, a tene un otro cumbre cu sindicatonan, gremionan comercial y partidonan politico en conexion cu e negociacionnan cu Hulanda pa loke ta trata Covid-19 manera cu Gobierno a bin ta haciendo desde cu a cuminsa negocia cu Hulanda na juni ultimo.  E intencion tabata pa informa nan y haya nan ‘sentimentonan’ riba e proposicion riba mesa. 

PARTICIPACION

Segun e comunicado di gobierno, esnan cu a participa na e cumbre a haci hopi pregunta al respecto y ta mustra cu ta convivi cu desaroyo di nos pais. Gobierno di Aruba un biaha mas ta score cu transparencia haciendo e encuentro virtual aki via paginanan social di Gabinete Wever-Croes y TeleAruba pa asina pueblo henter por a sigui e informacionnan duna den e cumbre.