Dowers: A logra consenso entre tur minister di husticia di Reino Hulandes

ORANJESTAD - "Nos a logra acorda tur punto riba e agenda den e reunion entre Ministernan di Husticia di Hulanda, Aruba, Corsou y Sint Maarten", asina Minister mr. Drs. Arthur Dowers a anuncia despues di a sali for di e reunion na Den Haag, Hulanda awe. Durante e reunion a yega na acuerdo riba funcionamento di e "Recherche Samenwerkings Team" cu ta opera riba tur e islanan den Caribe Hulandes. Tambe e Procurador Generalnan a repasa e casonan criminal tumando luga den tur e paisnan den Reino Hulandes. Aki a para un rato keto riba e situacion na Corsou, den cual e ola di criminalidad a aumenta y Hulanda ta sospecha cu den algun di e casonan ta sospecha cu tabatin hasta politiconan envolvi den e gruponan criminal aki.

Durante e reunion entre ministernan di Husticia a cera cabes y acorda cu lo traha hunto pa combati criminalidad den forma colectivo y cu sosten y cooperacion di tur e partnernan den Reino. Hulanda a acorda di ta dispuesto pa aloca fondonan disponibel pa por logra traha mas hunto den e lucha aki. A acorda durante e reunion na Hulanda cu cada pais lo pone hendenan disponibel den un comision. E meta di e comision ta pa traha un plan di accion cu lo mester presenta pa dia 1 di maart na tur e Ministernan di Husticia pa por haya aprobacion. A presenta un evaluacion riba e fenomeno di "Mensenhandel" y "Mensensmokkel" den e diferente paisnan. Tur e Ministernan participante a bisa di a keda satisfecho cu e evaluacion haci. Tambe a repasa e asunto di "Vreemdelingenketen" den e paisnan. Aunke cu na Aruba maneho di stranheria ta resorta bou di Minister Benny Sevinger, toch den e otro paisnan den Reino e maneho ta cay bou di husticia. A acorda cu lo evalua esey tambe dentro di poco. A traha un rapport y a presenta recomendacionnan pa e prizonnan den tur e islanan den Caribe Hulandes. CPT a duna recomendacion, pa cual tur pais lo formula un contesta pa manda pa e organisacion internacional.

Ministernan di Husticia a acorda cu mester yega na acuerdo pa intercambia profilnan DNA di criminalnan den tur e paisnan den Reino Hulandes. Esaki lo yuda soluciona casonan mas lihe. Pa logra esaki mester traha un Decreto Gubernamental pa haci esey posibel. No tur e paisnan ta cla cu e "Landsbesluit", pues no por cuminsa cu e forma nobo aki di intercambia informacion.

Corte di Husticia di tur e paisnan a prepara nan presupuesto, den cual ta necesario pa Gobiernonan inyecta fondo adicional di parti di cada Gobierno. Den e caso di Aruba falta fondo pa garantisa mantencion di e edificio cu apenas a caba di renoba y amplia. Tambe tin otro gastonan adicional cu a bin acerca, manera gasto di personal. Na final e diferente organisacionnan y instancianan hudicial a presenta nan relato anual di aña 2014 y nan plan di maneho di aña 2015 pa cual tur a wordo aproba.