Aunke no tin carnaval normal na 2021, SMAC ta habri e periodo si diaranzon

ORANJESTAD - Diaranzon awor 11 di November 2020 pa 5’or y 11 minuut di atardi Stichting Maneho di Aruba su Carnaval (SMAC) lo habri e temporada di Carvanal 67 cu hopi pikete. Asina nan ta informa den un comunicado. 

NO TIN CARNAVAL NA FEBRUARI 2021

Manera ya a comunica dia 27 di juli 2020 na e pueblo carnavalesco enberdad no lo bay tin Carnaval na januari/februari 2021. Mirando e situacion actual di COVID-19 y cu Carnaval ta aglomeracion di hende y teniendo na cuenta e situacion financiero actual, no ta na su lugar pa organiza Carnaval na januari/februari 2021. 

FECHA IMPORTANTE 

Sinembargo SMAC conhuntamente cu Gruponan Uni, Stichting Musica y Elite Studios a dicidi cu no por laga un fecha manera 11 di November pasa bay sin mas. 11/11 ta un dia special y ta e dia cu ta marca comienzo di e temporada di Carnaval no solamente na Aruba pero na mundo henter. Ta uza e temporada aki pa tene reunionnan pa con ta bay organiza carnaval durante e aña siguiente, pero tambe ta cuminsa traha riba e disfrasnan.

SPERANSA 

E aña aki apesar cu no tin Carnaval na januari/februari 2021, toch nos di SMAC tin e speranza cu e situacion lo drecha y cu na juni/juli 2021 Aruba por celebra Carnaval 67.

INVITACION

SMAC conhuntamente cu Musica y Gruponan Uni ta invita tur ganadornan di un premio durante Carnaval 66 pa un Drive Thru, Diaranson awor 11 di November 2020 di 5’or y 11 minuut di atardi pa 7’or y 11 minuut di anochi den Caya Grandi na Playa, caminda na altura di Elite Studios lo entrega Awards nan.

CARNAVAL VIRTUAL

Despues lo sigui un ceremonia virtual caminda lo presenta e Jingle di Carnaval cu un biaha mas, manera ta tradicion di hopi aña caba ta den man di e legendario DJ Ruben “Scorpio” Garcia y RBC cu ta sponsor e jingle aki. Tambe lo honra algun persona cu a contribui den gran forma na Carnaval y sera conoci cu e slogan pa Carnaval 2021. Lo finaliza e anochi aki cu un virtual afterparty. Por sigui e actividad aki riba e Facebook page di SMAC. Di e manera aki pues Carnaval ta conoce un etapa nobo y un temporada nobo.