Premier Wever a purba aclaria preocupacion di sindicatonan

ORANJESTAD - Durante conferencia di prensa di Gobierno di Aruba dialuna mainta, Prome Minister Evelyn Wever-Croes a aclaria e sucedido di siman pasa cu sindicatonan. Prome Minister a cuminsa enfatisando cu Gobierno di Aruba semper ta duna sosten na e sindicatonan di Aruba pasobra e sindicatonan ta esnan cu ta sali pa e clase trahado cu pa Gobierno ta hopi importante. 

KICO A PASA

Dos siman pasa tabata tin un grupo cu a bin bou di liderazgo di sindicato FTA y a purba forsa pa drenta paden na Bestuurskantoor. Prome Minister a expresa cu esaki sigur ta algo inaceptabel pa Gobierno y esaki a wordo treci tambe na sindicato FTA. 

PARA PA SINDICATO

“Si tin un gobierno cu a para semper pa sindicato ta esun aki di Gabinete Wever-Croes 1. Nos nunca a manda ni riot comando ni cacho riba ningun hende cu a bin manifesta. Semper nos a atende nan pasobra Gabinete Wever-Croes 1 ta kere den dialogo y ta duna importancia pa scucha nan pasobra nan ta trece preocupacion di nan miembronan dilanti. Nos ta compronde e emocionnan halto y e mal comunicacion cu tabata tin e dia ey, pero nada ta hustifica pa uza forsa pa drenta un caminda y/of uza palabra malo pa insulta hende.”, sra Wever a duna di conoce. 

INCIDENTE 

Prome Minister a referi tambe na e incidente di siman pasa cu sindicato Simar, SPA y SADA cu tambe a bin reclama cu tin cosnan cu a pasa cu no a bay bon. E Mandatario Principal a duna nan di conoce di tey semper pa nan, pero nan sa tambe cu pa motibo di reglanan durante temporada di COVID19, Prome Minister no ta sali mas padilanti di Bestuurskantoor pa evita di ta unda tin aglomeracion di hende. “Mi ta contra cu sindicatonan ta aglomera hende asina pero esey ta keda nan responsabilidad pero ami no lo expone mi mes na esey y duna ehempelnan cu no ta bon. Mi ta compronde, cu COVID19 of no e derecho di trahado mester wordo respeta y garantiza. Pero mester tene cuenta cu ainda nos ta den area di peliger y mester respeta y duna e bon ehempel como lidernan, sea ta lider di pais of sindical”.

MANDA MENSAHE

Normalmente, Prome Minister a duna di conoce, sindicatonan ta manda un mensahe na su persona of na esnan cu ta traha p’e y ta wordo palabra e ora unda y con lo reuni cu un delegacion di 2 of 3 hende. Pues loke cu a pasa siman pasa diabierna no tabata necesario pero si a ser acorda cu pa futuro sindicatonan lo avisa cu nan ta bin y na un forma ordena lo atende cu esaki. 

PREOCUPACION SINDICATO

Un preocupacion cu e Sindicatonan di Gobierno tabata tin ta cu nan a compronde cu e condicion di cortamento di salario ‘tot nadere orde’ ta conta solamente pa ambtenaar y no pa politico y mandatarionan. Esaki, Prome Minister a enfatisa, no ta corecto. Esaki ta un di e condicionnan di Hulanda y aworaki e fianza di Hulanda ta hopi importante pa nos y no por hunga cu esaki. E condicion di cortamento di salario tot nadere ordo ta conta pa Minister, Parlamentario, ambtenaar, trahadornan di companianan estatal y institutonan cu ta wordo subsidia door di Gobierno. Si algun ley manera di parlamentarionan mester cambia e lo cambia na caminda.

MANTENE SINDICATONAN INFORMA 

Un otro preocupacion di sindicatonan ta cu segun nan Gobierno no ta mantene nan informa. Prome Minister a expresa di no ta di acuerdo cu nan pasobra mescos cu a mantene Aruba informa di e negociacionnan cu Hulanda tur biaha, sindicatonan tambe tabata haya un update di negociacionnan cu Hulanda incluyendo cu e cortamento di salario cu ainda no tin un fin na dje.  Gobierno a palabra cu Hulanda cu den e prome cuartal di 2021 lo revisa e impacto economico y financiero y wak si por duna perspectiva ki dia e cortamento di salario di empleadonan publico por wordo reduci pa asina nan yega na nan salarionan bek. 

KEN TUR TA AFECTA PA CORTAMENTO DI SALARIO

Tambe sindicatonan di algun compania estatal a expresa nan preocupacion nan pasobra nan a comprende cu ta nan so ta paga e placa cu a wordo kita di nan salario pa FASE. Recientemente a resulta cu no ta tur a manda e placa pa e fondo ey pero a haya aprobacion pa nan use den nan mesun compania cu tabata tin loonsubsidie y no tabata tin entrada pa cubri nan gastonan. E palabracion di cortamento di 12.6% ta un palabracion cu Hulanda y nos ta mara na dje tanten cu nos mester di e fianza cu ta pa paga e propio salarionan tambe.