Minister Hooyboer ta contesta Evelyn Wever riba asunto di seguro

ORANJESTAD – Minister di Enseñansa Michelle Hooyboer a reacciona awe nochi, un dia despues cu lider di partido MEP Evelyn Wever pidi’e pa contesta pregunta riba e asunto di seguro pa studiantenan hulandes (lesa e articulo cu ta referi na esey, aki). For di momento cu e noticia a sali, cu a cambia seguro di e studiantenan, e partido di oposicion a indica cu esaki no ta algo corecto, y e siman aki te hasta menasa cu haci un denuncia. Ta trata di e hecho cu e compania Hulandes cu a gana e destaho y desde 1 di januari 2015 ta encarga cu seguro pa nos hobennan studiando na Hulanda cu tin Arubalening. E mandataro encarga cu enseñansa a sigura ayera un biaha mas cu e proceso a bay transparente y publico. “Aunke cu a splica tur cos den Parlamento y den prensa, toch e fraccion di MEP a opta pa cuminsa un campaña di difamacion contra Minister di Enseñansa, Michelle Hooyboer-Winklaar” e reaccion di su oficina a bisa awe nochi. Tambe pa comproba su legitimidad, a te hasta reproduci un copia di e 'uittreksel' di camara di comercio di e compania. Lesa esey aki. 

E mandatario a mustra cu e motibo principal pa organisa un destaho publico relaciona cu seguro pa studiantenan, tabata pa por a sondea un miho pakete cu miho tarifa y beneficio pa e aseguradonan. Ademas e mandatario a opta awe pa laga su abogado atende cu e corant y radio cu a tild’e di corupcion, mientras cu el a aclaria preguntanan di Parlamentario mr. Evelyn Wever, haci via di media pero cu oficialmente no a ser ricibi ainda na Ministerio, riba e compania di seguro Insure – to Study BV, cu ta resorta bao di e holding company Holding Jonker Schotte Adviesgroep BV estableci na Hulanda desde 1951. Bao di e Holding tin como compania Jonker-Schotte Assurantien estableci desde 1985 cu ta uza e handelsnaam Insure to Study desde varios aña caba.

Pa loke ta e detayes riba e compania di seguro, a splica cu Insure to Study BV a ser estableci na November 2014 como un “dochterbedrijf” di Holding Jonker-Schotte Adviesgroep pa e por carga e portofolio completo di asegurado internacional di studiantenan incluyendo esunnan di otro parti di mundo manera resto di Europa, Asia, etc. Insure to Study BV ta broker pa entre otro e compania di aseguro Europeesche Verzekeringen cu ta un compania di cual Gobierno Hulandes ta e ultimo beneficiario.

“Mi a tuma nota di e declaracionnan haci dor di Evelyn Wever-Croes den un solo corant y tambe via un solo media, na unda e ta haci algun preguntanan descabeya y ta sigui fomenta odio den su sed di venganza. En bes di haci pregunta di caliber cu contenido y cu ta basa su mes riba berdad, e Parlamentario ta tuma honor na su mes di sconde tras di mentiranan fomenta dor di su propio medio”, Minister Michelle Hooyboer–Winklaar a duna di conoce. “Evelyn Wever–Croes a trece argumentonan sin base y sigur sin tin e studiante na prome luga pero si ta defende segun loke por comprende, un grupo cu a tuma un posicion “previlegia” pa 20 aña largo cu nunca a bay un destaho publico pa yega di ta e broker di seguro pa nos studiantenan”. Segun e mandatario, ta pa e motibo aki despues di 20 aña a dicidi di caba cu e monopolio y habri e oportunidad via un destaho publico pa tur compania di seguro por participa. Y ta aki e dolor! A dicidi pa scoge pa mehoransa den e pakete di seguro y sigur yega na un polisa ahusta na beneficionan di e studiante y no beneficio propio na un bon tarifa.

"Ta bon pa pone di un manera concreto cu ningun hende di mi famia ta pertenece na e compania aki y ta haya ningun beneficio di e compania aki. Mi mayornan a lanta mi masha humilde y no tin espacio pa in-transparencia, mentira y nunca lo mi resorta na fabricacionnan cu fin nan politico.” Hooyboer a sigui bisa.

Mas leu e mandatario a sigui splica cu Aruba Huis a atende cu tur studiante, a informa nan di e cambio y a haya masha bon reaccion di e pakete atractivo cu nan ta dispone di dje awor y pagando hopi menos. Na fin di dia, ta e studiantenan lo tin cu paga nan fiansa bek. Pa Gobierno y al fin e studiantenan conhuntamente, ta spaar 1 miyon florin pa aña dor di cambia di broker y compania di seguro.

“Pa mi no ta un sorpresa e atake vil y baho di Parlamentario Evelyn Wever–Croes, mi no ta spera nada otro for di su maneho y su sistema di hiba politica cu no ta cuadra cu mi pensamentonan. Lo mi tuma pasonan legal contra e media di su escogencia y lo hiba tur cu tilda mi di corupcion na Corte!”, segun Minister Michelle Hooyboer. Na final el a bisa di ta lamenta cu e lider di MEP Evelyn Wever-Croes ta haci uzo di e plataforma aki y no a siña ainda cu e berdad ta persigui tur mentira. “Y ami ta sigui e paso di Good Governance y nada otro”, segun Minister Hooyboer. “Corupcion ta valido pa otro hendenan cu kisas ta den e kring di Evelyn Wever Croes mes y mi ta reta su persona pa ban Corte y trece su pruebanan. Ya cu na momento cu bo kier tilda bo mester bin cu hechonan”.