Atrobe sector di Time Share ta yudando turismo di Aruba den tempo di crisis

ORANJESTAD - Tur cos ta mustra cu un biaha mas e seccion di Time Share ta 'salbando' Aruba, e biaha aki den e pandemia di COVID19, si tuma nota di e comunicado mas recien di Aruba Hotel & Tourism Association. Mescos cu durante temop di Natalee Holloway y 9/11, ta e sector di Time Share a yuda saca Aruba di e problemanan aki.   Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y na October ocupacion tabata 17.2%.

OCTOBER 2020:

Ocupacion: E ocupacion na hotelnan tabata 17.2%, compara cu 76.3% un aña pasa, cual ta representa un caida di 77.5%.  

ADR: E balor average di cada camber bendi den October a subi cu 4.5% compara cu aña pasa, pa yega un average di $229.18. 

RevPAR: E entrada average pa tur camber disponibel tabata solamente $39.34, representando un reduccion di 76.5% compara cu e mesun luna aña pasa. 

AVERAHE 2020:

Ocupacion: E ocupacion average pa prome 10 luna di 2020 ta 26.4%; un reduccion di 69% compara cu e mesun temporada na 2019. 

RevPAR: E medida principal pa industria di turismo, esta e entrada average pa tur camber disponibel ta $88.07 pa e prome 10 luna di 2020. Un reduccion di 62% compara cu aña pasa. 

PROYECCION:

Proyeccion actual pa ocupacion di hotel ta: 25% na November, 34% na December y 36% pa prome cuartal di 2021. Expectativa pa 2021 ta un ocupacion average di 45%.  

Desde maart 2020 companianan directamente den turismo ta perdiendo placa tur luna, y tur indicacion ta cu lo sigui opera cu perdida den e lunanan nos dilanti. 

TIMESHARE:

E propiedadnan Timeshare ta experienciando un ocupacion mas halto cu hotelnan durante recuperacion di turismo. Na October ocupacion average tabata 37% y proyeccion pa November ta 41%.