Knops: Aruba y Hulanda no a caba negosha ainda!

DEN HAAG – Aruba y Hulanda no a caba negosha ainda! Esaki segun secretario di estado Hulandes Raymond Knops despues di a tuma nota di e conferencia di prensa di premier Evelyn Wever Croes. Segun sra Wever, Aruba ta cla y awor mester haya sentimento di Parlamento y gremionan pa despues e firmamento tuma lugar. Pero segun Knops, cos ta diferente. “E no ta cla, te ora e ta cla” e mandatario Hulandes a clarifica. Asina e ta contradeci e prome minister di Aruba, cu awe mainta a bisa cu gobierno di Aruba ‘ta cla cu e negosashonan’. 

IMPRESION

“Awe mainta minister presidente Wever Croes durante un conferencia di prensa a anuncia cu e negosacionan ta cla. Esey ta crea e impresion cu tin un acuerdo, y asina tambe ta parce for di preguntanan di prensa di Aruba. Esey no ta asina” Knops a bisa como prome reaccion. “Mester finaliza e ultimo puntonan ainda, y e no ta cla, te ora cu e ta cla” e mandatario Hulandes a finaliza bisando den un reaccion breve cu e portal aki a ricibi.   

ARUBA SU VERSION

Cu esaki, un biaha mas tin un diferencia di opinion entre Aruba y Hulanda riba e tema. Awe mainta, premier Wever a bisa textualmente “Mi por bisa cu nos di gobierno di Aruba, nos ta cla cu e negociacionnan. Nos a yega un punto final di e negociacionnan”. E mandatario a sigui bisa cu a yega na e textonan cu tin riba mesa cu gobierno (di Aruba) por haya su mes aden. “Pues gobierno di Aruba ta cla pa yega na e convenio final cu Hulanda” Wever a bisa. Posiblemente ey e interpretacion ta diferente, unda cu Wever ta bisa cu e ta cla, pero cu mester firma ainda cu Hulanda. Y despues e mandatario a sigui pa bay den detaye di kico tur a logra. Scucha e declaracion di e mandatario di Aruba AKI, bisando cu e ta cla.