Hotelero Ewald Biemans a drenta hunta di Fundacion Parke Nacional Aruba

ORANJESTAD - Luna pasa, nada menos cu e conocido doño y CEO di Bucuti & Tara Beach Resort – Sr. Ewald Biemans – a wordo introduci den e Hunta di Supervision di Fundacion Parke Nacional Aruba (FPNA). Asina e fundacion a informa den un comunicado. Cu esaki, segun e comunicado, e hunta di FPNA ta casi completo y cla pa e retonan cu tin den e futuro cercano: incluyendo e continuacion di profesionalisacion y e capacidad di recupera di e organisacion, y tambe e realizacion di proyectonan ambicioso pa conservacion y maneho di naturaleza, y sostenibilidad. Biemans ta 'join' Norman Kuiperi  cu ta presidi e hunta, Helen van der Wal y Sanju Luidens.

CV BIEMANS

Sr. Bieman pa decadanan a maneha Bucuti & Tara Beach Resort. Abou di su liderasco, e propiedad aki a wordo nombra na 2016 e hotel mas sostenible di mundo como un Green Globe Platinum resort. Na 2020, e resort a ricibi e puntuacion maximo di Green Globe; un certification di turismo sostenible. Tambe Bucuti & Tara Beach Resort ta e prome hotel den Caribe cu ta CO2-neutral. Luna pasa Bucuti & Tara Beach Resort a bira e prome hotel pa ricibi e premio prestigioso di Nacionnan Uni 2020 Climate Action Award. Biemans como un persona progresivo a indica di kier haci e propiedad “carbon negative”.

PASADO

Sr. Biemans tabata den pasado un miembro di e hunta di Fundacion Parke Nacional Arikok, operando desde 2017 bou di number nobo: Fundacion Parke Nacional Aruba. Su conocemento y experiencia tabata instrumental den creacion di Parke Nacional Arikok. Awor sin duda Sr. Biemans lo bay tin e rol importante den e transicion di FPNA den un organisacion mas sostenible cu tin e meta di logra “low-impact”. FPNA ta spera cu pronto por yama bon bini na e di cinco miembro di e Hunta di Supervision y asina aki e hunta lo ta completo.