Wever: Gobierno no tin un rol pa bisa si Ady Thijsen mester retira of no

ORANJESTAD – Gobierno no tin un rol pa hunga den bisa cua parlamentario mester baha of no.”Esey mi kier a pone hopi duidelijk”. Asina premier Evelyn Wever a contesta Noticiacla dialuna riba e pregunta si pakico ainda gabinete Wever Croes ta sostene presidente di parlamento Ady Thijsen, aun despues di su fayo rond di aprobacion di mocion y despues su rectificacion aunke sin su conviccion personal. 

E PREGUNTA

E pregunta tabata pa sa con bin gabinete Wever-Croes ta keda sostene sr. Thijsen como presidente di parlamento. Esaki apesar cu hopi ta bisa cu el a comete un fayo grave pa basa su decision pa inicialmente considera e mocion nan valido, a base di loke no ta skirbi den Reglement van Orde y Constitucion, en bes di loke si ta skirbi. Thijsen a yama esaki un "buraco den ley". Y como tal, e portal a sigui puntra e prome mandatario, con por sigui sostene un president di Parlamento cu ta haci uso di loke e ta yama buraco den ley pa interpreta su rol den parlamento. Ademas, aunke sr. Thijsen a coregi su eror, sin conviccion personal, un persona cu ta mina e nervio principal di nos democracia no mester retira?".  

BOLTER E CASO

E mandatario envez di contesta pakico ta sostene sr Thijsen ainda, a bira e situacion y a bay mas riba e fayo cu e awor ex minister (Lopez Tromp) a comete, door di no retira siendo cu tabatin 10 miembro di coalicion cu a bisa cu nan no kier traha mas cu ne.  Segun Wever a contesta corectamente, Parlamentario no ta depende di e sosten di gobierno, sino al reves. Punto sinembargo ta cu no ta e esey ta loke e portal aki tabata puntra e mandatario. “Gobierno di Aruba a bisa cu irrespecto si e mocion di desconfianza ta valido of no valido, atrobe mi no a bisa cu mi no ta respeta ley, pero irrespecto si e mocion ta valido of no, nos ta den un situacion di problema cu e ex minister a hinca su mes aden” e mandatario a cuminsa na contesta e pregunta, tirando e asunto riba Lopez Tromp envez di bay riba Thijsen, y ripiti tur e loke e awor ex mandatario a haci of no haci den e situacion cu e la haya su mes aden.  

E MOCION MES

Segun Wever, gobierno a tuma nota di e mocion mes, y e discusion riba e varios interpretacion nan cu tabatin di ambos banda. “Y nos a bisa, esey nos ta pone un banda. Nos a bay traha riba si nos tabatin” Wever a sigui bisa. Y a sigui papia riba Lopez Tromp. Riba esaki, e portal a sigui puntra sra Wever, cu mirando tur e resistencia cu tin den pueblo (a menciona e varios encuestanan di cual algun tabatin hopi participacion y tur negativo pa sr Thijsen, con bin ainda gobierno ta sostene. “Pero gobierno no tin un rol eyden” Wever a ripiti bisando. “Nos Statuut ta sali for di punto di bista, cu si algo pasa un caminda, e mes redreseer e, cambiel’e, ta nan asunto. Y nan a handle e” Wever a sigui bisa. E ora e portal aki a puntra si gobierno ta ‘ok’ cu e forma cu a ‘handle e’. “Gobierno a haya un mocion di desconfianza, y tumando nota di tur e discusion cu tabatin riba legalidad di e mocion, e diferente interpretacion si e ta legal y no legal” Wever a sigui bisa. Gobierno, segun sra Wever, a bisa cu ta bay cana nan caminda. Y aki a bolbe bay riba Lopez Tromp. “Y esey ta e cos mas importante” e mandatario a sigui insisti. Na final, e mandatario no a contesta, si ainda ta sostene sr Thijsen of no y a lague na cu gobierno no tin e tarea pa dicidi ken tin cu retira of si tin cu retira un of otro parlamentario, den e caso aki, sr Thijsen. Por scucha e intercambio AKI.