Wever: Prome cuartal 2021 lo determina ki ora ta para e ‘cortamento di salario’ vigente actualmente

ORANJESTAD – Durante e prome cuartal di 2021, gobierno di Aruba tin intencion pa sinta cu Hulanda pa determina te ki tempo lo mantene e cortamento di salario manera cu ta na vigor aworaki. Asina prome minister Evelyn Wever a bisa durante conferencia di prensa dialuna mainta. Cu esaki e ta referi na e preocupacion di e tres sindicatonan SADA, SIMAR y SPA cu tabata preocupa riba e tereno aki y a demonstra esaki siman pasa. 

E SITUACION

Manera ta conoci, aworaki tin un situacion unda cu riba exigencia di Hulanda, gobierno a corta salario di trahadonan publico cu entre 5 pa 12%, ‘te proximo aviso’, mirando e impacto di COVID19. En principio, esaki lo mester tabata te fin di e aña aki, pero despues Hulanda a cambia esaki pa ‘te proximo aviso’. Algo cu sindicatonan no a aprecia. Mirando cu fin di aña ta yegando, e sindicatonan kier sa kico ta pasa despues di 2020, y si ora cu e aña nobo aki habri, si esaki ta keda vigente si of no.