Chong: Yamada di molester di sangura a aumenta drasticamente na Aruba

ORANJESTAD – Hefe di Gele Koorts Muskieten Bestrijding (GKMB) Luis Chong a haci un yamada urgente diabierna na comunidad pa e situacion cu tin di sangura rond di Aruba. Yobida mas frecuente a pone cu e awa rond di cas cu ta keda para, no ta seca dje lihe ey, cu ta causa cu tin hopi mas criadero di Dengue. Tin un aumento drastico den yamada di molester di sangura na Aruba segun Chong. Ta atende cu esaki. Pero ta ripara cu nan tin keho di sangura, pero ta resulta cu e cas mes tin criadero. Esey ta bira un tipo di trabou double pa GKMB pasobra ta trabou cu e ciudadanonan mes por y mester haci. 

LIBER DI BROTE PA 10 AÑA

Segun Chong, Aruba tabata liber di brote of epidemia pa 10 aña di dengue. Historicamente cada 10 aña un epidemia di dengue a surgi na un pais. Den nos region, cierto paisnan a haya un brote aña pasa di dengue, pero Aruba a wordo gespaard. Pero si un persona drenta cu e dengue aki na Aruba, e por causa un brote inmediatamente  of te hasta un epidemia. Como tal a haci peticion pa elimina criadero rond di cas. E ta un situacion di peliger segun e hefe di GKMB. No tin indicacion ainda cu tin brote di dengue na Aruba, pero esaki ta eminente si un hende drenta cu ne awor. 

SANGURA BANDA DI HOTEL

Tin hopi yamada ta drentando via social media tambe cu tin hopi sangura rond di hotelnan. Esaki ta diferente na dengue, unda cu ta trata di sangura di mangrove cu ta crece den e area ey. Ta debi na e yobida cu ta keda para na mangrove cu ta pone cu esaki ta bira un molester pa e area aki. Ta atendiendo cu esaki via AHATA y a haci palabracion cu ta fumiga e cantidad di sanguranan adulto. Mientras cu nan no ta causa dengue, nan ta un molester si.