Sindicatonan SADA, SIMAR y SPA a duna gobierno un siman

ORANJESTAD – Sindicatonan SPA, SADA y SIMAR a duna gobierno te otro siman diabierna pa duna nan (e sindicatonan: red) un contesta riba nan situacion di entrega di salario. Esey a keda palabra entre gobierno y sindicato diabierna atardi despues cu e tres lidernan sindical a drenta Bestuurskantoor pa e sindicatonan entrega gobierno nan carta di preocupacion. Asina e atardi cu a inicia for di 2’or, a culmina pa e miembronan di e sindicato. 

E ATARDI

Tabata diabierna tra’i merdia 2:45pm cu e lidernan sindical riba e Renaissance Festival Plaza a presenta nan mes dilanti nan miembronan pa splica nan asina riba e incertidumbre cu nan tin pa cu nan situacion di entrega di salario. A splica e.o. e trayecto cu a cana or di juni, te na e carta cu a manda cu ultimatum pa topa dia 4 di November ultimo. A splica tambe cu gobierno a contesta diahuebs anochi pidiendo comprension pa e situacion financiero. Finalmente a pidi e miembronan si nan kier pa entrega e carta di contesta pa gobierno, diabierna mes of otro siman. E miembronan mesora a bisa cu nan kier entrega esaki awe diabierna mes, pa cual a cana cruza caya y yega Bestuurskantoor. Aki mester a warda basta, ya cu e ministernan tabata den reunion cu crisis team pa COVID19. Finalmente a permiti tres lidernan sindical subi y entrega e carta y baha bek. Aki ta unda cu a duna gobierno te otro siman diabierna pa contesta e sindicatonan, sino por spera mas escalacion di accion.