Director di Serlimar Sui Generis a confirma su retiro

ORANJESTAD – Director di e compania di limpieza Serlimar Sui Generis Anko Koopmans, a confirma pa e portal aki cu el a entrega su retiro como director diahuebs na e compania. “Si, ayera mi a entrega mi retiro” e pronto ex director a confirma pa noticiacla diabierna merdia. E noticia a keda publica mas prome pa e portal 24ora, pero nan sinembargo a menciona cu nan no tabatin e confirmacion di de ainda. E awor pronto ex director  tin 2 luna mas pa bay, segun e mes a bisa, pa loke ta su ‘opzegtermijn’. Ora cu a puntre e motibo, e tabata mas corto” Motibonan personal”. Minister responsabel pa medio ambiente y tambe Serlimar, sra Evelyn Wever Croes no a reacciona ainda riba esaki pa e portal.

DIRECTOR NA CABEZTabata na apenas maart di e aña aki cu a apunta sr Koopmans na cabez di e compania, despues cu a core cu e director anterior Henley Davelaar. Koopmans a bira director di DTI prome na November di 2018.  E hecho cu e director actual a retira, por nifica cu tin asuntonan cu no ta canando bon, y of cu decisionnan cu lo tin cu tuma y of a tuma, no ta na agrado di Koopmans. No tabatin e pensamento cu e lo a keda asina cortico, pues ta algo mester a sosode diripiente cu a pone cu sr Koopmans a sorprende tur hende cu e retiro aki. Algun dia esaki tabata circula si, per finalmente manera e mes a confirma, diahuebs e mes a entrega su retiro. 

NO NONSENSE

Durante su periodo cortico na Serlimar, el a goza di sosten di e ex minister Marisol Lopez Tromp cu tabatin bon palabra so pe. Ta bou di Koopmans, cu e compania a dicidi di pidi proteccion di creditornan pa asina evita un posibel bancarota, debi na e situacion financiero precario. Algo cu a causa entre otro e ruptura entre partido POR y awor ex minister Marisol Lopez Tromp. E decision di pidi proteccion, a resulta faborable pa  e compania y huez a otorga un period di 18 luna pa e compania por a restructura, sin cu e tin cu tin rosea cayente di e creditornan.