Sindicatonan no a keda contento cu carta di premier

ORANJESTAD – “Nos a haya contesta si pero esey no ta e contesta cu nos kier”. Asina presidente di sindicato SIMAR Josephine Albertus a bisa noticiacla diabierna mainta reaccionando riba e carta cu premier Wever Croes a manda un dia prome como contesta pa e sindicatonan. “Tur biaha nos tin cu warda, warda y despues nan ta bin op het laatste moment bisa si, Hulanda di nos tin cu hacie awo!”, Albertus a sigui bisa. Mientrastanto presidente di sindicato SADA Eduard Maduro tambe a bisa cu e carta no ta hustifica paramento di e reunion di awe. 

KICO SINDICATO KIER ANTO

Segun Albertus, nan pensamento (di sindicato: red) ta cu awor nan por sinta hunto, negosha, wak kico por, kico no por pa ora cu nan (gobierno: red) bay negosha cu Hulanda, nan por bisa cu nan a negosha cu sindicato y cu eynan nan a yega y nan por wak e ora ey con nan por sigui negosha cu Hulanda. “Pero e cos ki di warda cada biaha te ultimo momento, nos tin cu bin un reunion, den un ora bo tin cu bisa si of no. No por” Albertus a finaliza bisando. Cu esaki e ta mustra cu e carta di e premier no ta suficiente pa para e reunion di e miembronan di sindicato planea pa awe tardi 2’or.