Minister no ta comparti pensamento di ATIA riba metemento den compania

ORANJESTAD – Minister responsible pa aeropuerto (Triple A NV) Dangui Oduber no ta comparti e pensamento di e gremio comercial Aruba Trade and Industry Association (ATIA), cu e lo ta metiendo den e compania. E ta reacciona riba e critica di e gremio un dia anterior cu a mustra cu nan tin problema con gobierno y sindicatonan ta mete den maneho di compania, refiriendo entre otro na aeropuerto. Den un reaccion pa e portal aki diahuebs, e minister a splica kico e kier men.

PENSAMENTO DI MINISTER

Segun e mandatario, maneho di gobierno den temporada di e pandemia (crisis) aki ta dirigi riba mantencion di cuponan di trabou. Netamente pa cumpli cu e maneho aki e gobierno aki a percura pa companianan priva y companianan estatal haya loonsubsidie y ayudo financiero pa midden- en klein bedrijf. Segun sr Oduber, e principionan di corporate good governance ta stipula cu gobierno como un accionista tin influencia riba un compania estatal. “ E lo ta hopi straño si e gobierno como accionista di un compania estatal lo laga e compania actual bay liña recto contra e maneho general di gobierno” e mandatario ta bisa. Den e caso aki e maneho general di gobierno ta mantencion di cuponan di trabou.  

NO TA DI ACUERDO CU ATIA

“Awor, si ATIA ta considera cu bisa un compania estatal pa sigui e maneho general di gobierno cu mientras e compania ta ricibi loonsubsidie no ta hustificabel pa kita empleadonan obligatoriamente for di trabou como metemento y cu esaki ta peligroso, esey mi ta lague na nan opinion y pensamento cual naturalmente mi no ta comparti” e mandatario a bisa. “Nos ta sali for di e punto di salida pa mantene cuponan di trabou mas tanto cu ta posibel. Dia un gobierno como e shareholder di e compania estatal no por determina of influencia maneho di un compania estatal por medio di e board, e ora ey mihor gobierno bende tur e sharesnan di e compania!” sr Oduber a bisa finalmente.