SADA, SIMAR y SPA lo reuni bou ora di trabou cu su miembronan diabierna

ORANJESTAD – Sindicatonan SIMAR, SPA y SADA ta reuni durante ora di trabou, cu nan miembronan diabierna awor pa informa nan di e impasse actual cu gobierno. Mas concreto, e falta di atencion cu gobierno ta dunando e sindicatonan aki riba e tema di entrega di salario y mas importante, su recuperacion na 2021. E reunion lo tuma lugar riba e Renaissance Festival Plaza diabierna despues di merdia 2'or. 

KICO A PASA

Segun e vocero di e grupo di tres sindicato, Eduard Maduro, e sindicatonan no ta hayando oido y e respet necesario di e sindicatonan y a dicidi pa ta ora pa informa miembronan di e falta di respet y atencion aki. Concretamente, a manda un carta pa gobierno pa un reunion fin di October 2020, pero no a tende nada bek. Despues a manda un rappel, y riba esey nan a haya un contesta mesora indicando cu ‘gobierno no ta cla pa sinta cu nan na mesa pasobra no ta cla cu presupuesto 2021 ainda’. Esaki a causa disgusto, y a manda un carta bek pa gobierno cu e contesta cu esaki ta inaceptable y cu kier un reunion mas tarda 4 di November 2020. Esey tabata diaranzon pero no a haya niun reaccion di gobierno. Ni un carta of mensahe. Esey a pone cu a dicidi cu diabierna awor, ta convoca un reunion urgente cu tur miembro di e tres sindicatonan. Tambe a haci un invitacion pa ambtenaar di otro departamento sea ta den un sindicato of no, pa bin y scucha kico ta e situacion y posiblemente dicidi e siguiente paso.