Corte: E di dos Toque de Queda impone tabatin base legal

ORANJESTAD – Huez a dicta diahuebs mainta cu e di dos Toque de Queda cu gobierno a impone recientemente, ta valido. Mientras cu e portal aki no tin e informacion di corte mes, minister di Turismo Dangui Oduber a confirma esaki riba su pagina di Facebook awe mainta. Segun Oduber, Huez a dicta cu TDQ ta legitimo y no desproporcional! “Gobierno su maneho ta uno responsabel” e mandatario a bisa.

E CASO 

Tabata mitar di October ultimo cu Ministerio Publico a pidi huez pa dicidi legalidad di e di dos Toque de Queda pa COVID19. Den un comunicado pa prensa, e organo aki (OM) a presenta na Corte e pregunta si e Toque di Queda cu a keda impone na augustus ultimo, tin suficiente base legal y por wordo considera legitimo. Ta na Corte pa dicidi si e (di dos) Toque di Queda aki tabata necesario y proporcional. Un Toque di Queda ta un medida cu ta limita libertad di e ser humano y cu ta viola derechonan ancra den e Constitucion di Aruba y e Tratado Europeo pa Derechonan Humano (EVRM).  

CONDICION IMPORTANTE 

Un condicion importante ora ta impone restriccion nan riba derechonan fundamental ta cu esakinan ta necesario y proporcional. EVRM ta exigi specificamente cu restriccion nan cu wordo impone, ta semper respeta e esencia di e derechonan fundamental di e ser humano. Corte Superior di Derechonan Humano ta reconoce si cu estadonan cu ta cay bao EVRM, tin cierto ‘margin of appreciation’ (of espacio pa uza nan mes huicio) ora di tuma medidanan preventivo pa cu proteccion di salud.

TOQUE DE QUEDA ACTUAL

E Toque di Queda actual a keda estableci pa medio di un ministeriële regeling riba 28 di augustus 2020. E prome Toque di Queda a wordo, conhuntamente cu varios otro medida, estableci na maart di e aña aki y a dura te fin di mei. Durante e periodo ey tabatin un cantidad di medida: frontera tabata cera, tur horeca tabata cera, tabatin Shelter in Place, schoolnan tabata cera y companianan no-esencial tabata cera. Ministerio Publico ta di opinion cu tabata hustamente e conhunto di tur e medidanan aki cu a haci cu e Toque di Queda tabata legitimo. Corte tabata de acuerdo cu esaki y Huez a considera e prome Toque di Queda legitimo. 

NO A TUMA MEDIDA

Sinembargo, ora di establece e Toque di Queda actual na augustus ultimo, no a tuma ningun di e medidanan aki. Frontera a keda habri, hotelnan, restaurantnan y companianan a keda habri y no tabatin Shelter in Place tampoco. Ministerio Publico a bisa esten, tambe den media, cu e cuestion ta bay ta si e di dos Toque di Queda lo wordo acepta di nobo pa Huez den Corte, considerando e circumstancianan menciona aki riba.

TRATAMENTO

Durante e tratamento di awe y tumando tur cos den consideracion, Ministerio Publico a finalmente yega na e huicio cu e Toque di Queda actual no ta cumpli cu exigencianan. Ministerio Publico a pidi Huez pa sigui cu ontslag van alle rechtsvervolging (ovar, exoneracion di persecucion) di e dos sospechosonan cu a wordo hiba dilanti huez pa violacion di e (di dos) Toque di Queda.