Fundacion di Colegio a yuda mayornan cu mas di 50 mil florin

ORANJESTAD  - Pa an?a escolar 2019- 2020 Stichting Sociaal Fonds Colegio Arubano a cubri pa e suma di Awg. 52.412,- florin na gasto pa mayor y alumnonan di Colegio Arubano. Asina e fundacion ta relata den un comunicado. Segun e fundacion, specialmente e contribucion mensual pa alumnonan den forma di pakete di cuminda a subi compara cu e an?a anterior, debi na e pandemia. Na pakete di cuminda e fundacion a paga Awg 29.300. Mirando e necesidad di mayornan, e fundacion a hasta subi e suma di e pakete di alimentacion y tambe extende esaki pa e luna di juli, cu ta luna di vakantie. Otro gastonan di e fundacion tabata entre otro, pago di bukinan, na un total di Awg 9.221 y ouderbijdrage Awg 345. Hunto un total di Awg 9566,-. Pa candidatonan pa examen e fundacion a paga un total di Awg. 3000. Ademas e fundacion a yuda alumnonan indocumenta cu un suma di Awg 3702. Na desayuno pa alumnonan di menos recurso e fundacion a cubri e suma di Awg. 1911,-. Na pakete di fin di aña den december Awg. 3835,-. Na entrada e fundacion a ricibi Awg. 35.153 florin. Esaki ta 15.000 menos cu e aña anterior. E menos entrada di e fundacion ta cu tur probabilidad debi na e pandemia. Hopi organisacion no por a tene nan acostumbrado fundraising y Stichting Sociaal Fonds ta depende di e donacion di e organizacionnan aki.

CONTRIBUYENTENAN

Contribuyente nan mas principal cu a haci donacion na e fundacion, ta e propio docentenan di Colegio Arubano. Tur luna e docentenan y e personal administrativo ta haci donacion pa cubri e gastonan di e alumnonan di menos recurso di e scol. Mas cu agradecido, directiva di e fundacion Social tin aprecio pa e personal di Colegio Arubano. Mas cu tur otro nan ta e promenan cu ta keda confronta cu e necesidad di e alumno y ta brinda un ayudo real cu nan donacion mensual. E alumno y nan mayor, ta aplica pa ayudo por medio di e trahadornan social di Colegio Arubano. A base di e relato y e recomendacion e forma di e ayudo pa e alumno ta keda aproba.

CON ABO OF BO ORGANISACION POR YUDA?

Pa e aña escolar aki, e fundacion ya a haya hopi peticion pa ayudo for di mayornan. Cualkier instancia of particular cu kier yuda e docentenan den e causa aki, ta keda invita pa haci nan contribucion. Por haci donacion na cuenta di RBC nr 7700000013852249 na nomber di Stichting Sociaal Fonds Colegio Arubano. Persona di contacto na scol ta conrector Richelle Noel den oranan di oficina. (email: richelle.noel@colegioarubano.aw ) Secretario. Otro personanan di contacto ta Janelle Vlaun (vn.wi@colegioarubano.aw) Presidente of Richeilla Wijngaarde (rw.is@colegioarubano.aw) tesorero.Stichting Sociaal Fonds di Colegio Arubano ta existi como fundacion desde 2007 y ta inscribi na Camara di Comercio. Como organisacion dentro di Colegio e forma di ayudo aki ta existi ya for di an?anan 80.