FTA: Dunador di trabou mester tene mas cuenta cu e trahador den tempo di crisis

ORANJESTAD - FTA a tuma nota di e critica di ATIA den direccion di gobierno y parlamento y tambe FTA pa e situacion laboral na Aruba Airport Authority. Den nan reaccion pa e portal aki, nan ta bisa cu nan (FTA) ta desea cu ATIA y tur dunador di trabou, incluyendo esun di AAA compronde cu den e momento di crisis aki calidad di bida di e clase trahador ta core peliger y den momentonan di crisis ta importante pa mantene empleo mas tanto cu ta posibel y duna e trahador un trato mas husto posibel. 

CONCIENTE

FTA ta conciente cu e crisis origina door di Covid-19 a afecta e unico pilar economico di e pais fuertemente. Pero asina mes cu subsidio tin hopi dunador di trabou kier opta pa termina relacion di trabou di hopi tata y mamanan di famia.

COMPANIA TA PROBECHA

“Nos ta considera cu hopi compania ta mustra cu nan kier probecha di e situacion di crisis pa tuma medida exagera pa scapa e compania y perhudica e empleadonan, maske cu tin e posibilidad pa por sinta na mesa y yega na mihor acuerdonan cu nan empleadonan of sindicato” Hubert Dirks, presidente di e sindicato ta bisa. Sinembargo FTA na ningun momento a rechaza e proceso pa re-organizacion cu un trato husto, si realmente un compania tin e necesidad pa haci re-organizacion. “Den e caso aki nos ta spera di e dunador di trabou pa negocia cu respet un acuerdo husto cu su empleadonan/sindicato, pasobra no ta corecto y ni husto pa e trahadornan cu a dedica hopi tempo na un compania, mester acepta poco placa pa perde trabou cu e lo no haya bek facil”.

CRITICA DI ATIA

“Nos por compronde e critica di ATIA, pero na mes momento ATIA y su directiva cu tin un miembro di directie di AAA den dje mester compronde cu AAA por haye den situacion dificil, pero manera cu e situacion mehora e lo ta prome pa recupera, pero pa e trahador, sigur si ta trahadornan di edadnan mas halto cu perde trabou lo ta mas dificil pa haya trabou bek” Dirks a sigui bisa. Pesey segun Dirks ta sumamente importante pa e tata y mamanan di famia yega na un acuerdo mas husto posibel cu AAA, cual FTA ta boga pe. 

CAPACIDAD PA RECUPERA 

Si tin un compania cu tin e capacidad pa recupera financieramente mas rapido cu cualkier otro compania ta Aruba Airport Authority, cu ATIA mester ta conciente di esaki, pero lamentablemente cu apesar cu tin miembro di directie y miembro di ATIA cu si lo bai keda cu su trabou, ta apoya pa crea desempleo y problemanan social, pero e ta keda cu su trabou.

SITUACION DIFICIL

FTA ta kere cu den situacionnan dificil, e compania AAA cu tin lomba hancho mester por yuda esnan cu lo bira desemplea. Nan ta compronde cu cada compania mester por funciona independientemente cu ta importante, pero tambe pa e tuma e decision pa duna un trato husto na su empleadonan cu e no ta desea mas na trabou. Den e caso di AAA no a opta pa yega na acuerdo cu FTA pa duna un trato mas husto na su empleadonan. 

E compania Aruba Airport Authority N.V. ta importante pa pais Aruba y mester ta den bon condicion pa sigui opera sanamente, pero no ta kita afor su responsabilidad y ta husto cu empleadonan cu e ta termina den tempo di crisis. 

MENTALIDAD 

Pa e motibo di e mentalidad y intencionnan inhusto di e dunadornan di trabou pa crea problemanan social structuralmente, pa mantene e rikeza di e negoshi a todo costo, ta haci necesario pa sindicatonan sali dilanti pa e trahadornan indefenso. Pa esaki nos politiconan tanto den gobierno y parlamento tambe tin e responsabilidad y deber pa haci posibel pa alcanza un reparticion husto di e rikeza cu ta wordo produci cu sudor di e trahador, pa salvaguardia e calidad di bida di e pueblo aki den e momento di crisis aki y na tur momento. Pa logra un trato husto sindicatonan tin e deber di hiba un lucha fuerte den un pais democratico pa mantene husticia social, principalmente unda cu dunadornan di trabou no tin e curazon y boluntad pa cumpli cu esaki.   

RESPET 

Den caso di e situacion na AAA, sindicato FTA a mantene respet pa e dirigentenan di e compania, pero ta keda cu su derechonan hiba protestanan unda ta haya ta husto.