Wever: A pasa autoridad pa firma pa tereno, den man di DIP

ORANJESTAD – Gobierno a pasa autoridad pa firma pa tereno, den man di Dienst Infrastructuur en Planning (DIP). Asina e minister encarga cu infrastructura Evelyn Wever Croes a bisa den un comunicado diahuebs mainta. Cu esaki, segun e mandatario, ta depolitisa e acto aki pa evita cu por papia di fabornan politico. E mandatario a bishita DIP y informa e empleadonan di e cambio aki. 

COS A BAY MALO

Segun e mandatario, DIP ta un departamento cu pa hopi aña (bou di maneho di diferente Minister; Sevinger, Oduber, Lopez-Tromp) a cuestiona integridad di e departamento. Den cuadro di esaki tin algun cos cu a bay malo y tin algun hende/empleado cu a coopera cu e cosnan cu a bay malo. Sinembargo loke cu a bay malo no ta den man di e mayoria di empleadonan di DIP, cual ta hendenan cu ta traha duro cu dedicacion na hiba Pais Aruba dilanti. E personanan aki na cierto momento tambe ta wordo demotiva door di tende di e cosnan cu ta bay robes.   

DEPOLITISA 

Un paso hopi importante cu a tuma ta cu personalmente y simbolicamente e mandatario a traspasa e autoridad di firmamento di akte for di Minister pa e departamento. A depolitisa e proceso di otorgamento di tereno y esey kiermen cu di awor en adelante, terenonan cu wordo firma ta wordo firma na e departamento door di e director y un otro persona cu e principio di cuatro wowo. Pues dos hende ta revisa tur cos. Haciendo esaki, e chens pa cosnan bay robes ta hopi menos. Y lo no por tin metemento politico mas. Metemento politco por cierto ta entre e topico di investigacion di caso avestruz y caso flamingo. Cu e traspaso di autoridad aki lo no por tin casonan di corupcion mas cu metemento di Ministernan. Esaki ta algo cu comunidad Arubano merece, sra. Evelyn Wever - Croes a accentua.

BENEFICIO

Un otro beneficio ta cu: Ta acelera desaroyo economico pa motibo cu hopi desaroyo economico ta depende di otorgamento di tereno y lamentablemente esaki tabata tranca na bureau di ex Minister. Tabatin mas di 500 akte di personanan cla pa construi cas y/of planta, pero e akte no tabata wordo firma pa nan haya e tereno. Aworaki e proceso lo wordo agilisa pa cada persona por haya nan tereno.

Ademas, den pasado hopi biaha tabata mira e preferencia politico di esun cu ta pidi e tereno, aworaki como e persona responsabel pa e departamento aki, esey no ta asina, Prome Minister a enfatisa. 

TUR CIUDADANO TIN DERECHO PA HAYA TERENO

Cualkier ciudadano di Pais Aruba cu tin deseo pa construi un cas, tin derecho pa haya tereno pa construi nan cas y mescos ta conta pa esnan cu tin deseo pa ricibi un pida tereno huurgrond pa por planta. Pa locual ta trata terenonan comercial, prome cu e firma tuma luga na e departamento, lo consulta pa mira si e ta pas den e vision di Gobierno.

KIBRA CORUPCION

“Esaki ta un stap grandi den kibra cu corupcion den gobernacion, pasobra Aruba a mira un era desde ex Minister Sevinger cu hopi corupcion caminda cu el a cambia proceduranan pa e tin autoridad. Awor a caba cu esey y pues ta e prome paso pa garantiza henter pueblo di Aruba cu e corupcion cu a conoce (den caso avestruz, flamingo y tal ves pauwies) awor a caba y cu ta trahando cu integridad pa Aruba.