Con e eleccion Presidencial Mericano ta afecta Aruba

ORANJESTAD – Mientras cu mundo ta warda e resultado di eleccion presidencial Mericano, Aruba tambe tin su pensamento. Tin un grupo grandi cu ta pro Trump pa e continua 4 aña, y tin un otro grupo grandi cu ta pro Biden. Cada un pa nan motibo. Oficialmente, Aruba no ta tuma partido, y segun prome minister Evelyn Wever Croes, e no ta premira cu lo tin un diferencia si ta Trump ta bolbe gana of si Biden logra bira e proximo presidente.  AHATA, ATA y un comerciante local tambe ta splica nan pensamento riba e tema. 

PROME MINISTER

Den un reaccion breve pa e portal aki, premier Wever Croes a bisa “Nos ta wardando e resultado oficial”. Y por compronde e forma neutral di reaccion, ya cu Merca ta e mercado mas grandi cu ta produci turista pa Aruba. Algo cu Wever Croes ta recorda.” Aruba tin un relacion cu Merca di hopi tempo, y e ta un bon relacion” Wever a sigui bisa. Riba e pregunta di si ta haci diferencia ken gana e eleccion pa Aruba, e mandatario tabata corto pero preciso tambe: “ Irespecto ken gana eleccion, pa nos ta importante pa continua e relacion ey” Wever a bisa, y a sigura atrobe cu e no ta premira un cambio dependiendo ken gana.  

ATA

For di oficina di turismo, ATA, su CEO tabata mas concreto riba su analisis pa cu e efecto di un eleccion presidencial Mericano tin riba Aruba. “Tin diferente factor den mi opinion” Ronella TjinAsjoe ta cuminsa bisa. “ Compra di un vacacion ta mara na "consumer confidence" cual ta impacta "consumer spending", incluso pues compra di un vacacion. Den caso di Aruba cu prijsnan mas eleva cu varios otro den Caribe, esaki ta algo pa tene na cuenta” e CEO ta sigui bisa. “ E ta sinembargo algo cu ta impacta vacacion en general. Pues di e banda aki e confianza mester tey y e disponibilidad pa efectua e compra mester tey! Recuperacion economico ta importante” TjinAsjoe a sigui bisa. Pa loke ta directamente e relacion di e eleccion y Aruba,  sra TjinAsjoe a bisa lo siguiente: “ Pa mara esaki mas na un eleccion, hopi biaha ta warda riba e resultado y tuma decisionnan. Pues unabez eleccion pasa lo tin mas claridad riba e patronchi di consumidor tambe pa cu compra di un vacacion”. E ta bisa mes momento tambe cu  aki mester bisa cu semper ta keda e grupo cu lo biaha no obstante e resultado. “ Simplemente nan lo sali for di e stress di biba den ciudadnan grandi y lo busca Caribe / un vacacion di playa. E tendencia di tin esaki como preferencia como vacacion ta halto bou di e consumidor Mericano na es momentonan aki”. Segun e CEO,  e otro aspecto pa tene na cuenta ta e maneho di e virus. “ Mihor esaki ta maneha / contene na Merca, mihor pa biahe. Lo tin "after all" menos medidanan y e consumidor por tin mas trankilidad y confianza en efectua un biahe” sra TjinAsjoe a sigui bisa. Otro factor tambe p.e. pa tene na cuenta ta e impacto riba mundo di aviacion. E ta recorda cu te cu algun luna pasa gobierno Mericano tabata duna sosten na aerolineanan Mericano (CARES Act). Esaki no ta e caso mas. “Pues ta di mira kico e siguiente paso nan lo ta pa cu esaki. Claro "airlift" di Merca ta sumamente cardinal pa Aruba. Sosten na individuo nan y negoshinan en general di parti di gobierno - mesun cos cu ta e caso pa Aruba - claro tambe ta hunga un rol” TjinAsoe a sigui bisa.

AHATA

E CEO di Aruba Hotel & Tourism Association (AHATA) esta Tisa LaSorte tabata mas breve pero tambe conciso. “Francamente e aña aki ta asina weird. Unico mi por bisa: Tradicionalmente un eleccion na Merca ta causa cu e aña ey tin menos turista Mericano na Aruba mientras cu Mericano ta warda pa gasta den temporada di incertidumbre pa cu futuro” LaSorte ta cuminsa na bisa. “ Mas tanto e efecto ta prome cu eleccion. E aña aki tin COVID tambe, kiermen e ta un elemento den varios elemento cu a y ta afecta 2020” e la finalisa bisando.

COMERCIANTE LOCAL

Un comerciante local grandi cu a prefera di keda anonimo, tabata esun cu tabatin menos di bisa, pero no menos importante. “ (Joe) Biden a bisa cu e lo subi belasting, kiermen menos placa pa turista bin Aruba” el a cuminsa na bisa. Cu si e ta kere cu esaki por stop turistanan di bin, el a bisa “Not really. Nan gusta Aruba”. Esey kier men tambe cu nan lo sigui bin, pero dependiendo di esun cu bira presidente, nan poder di compra lo ta diferente. 

E PUEBLO

Riba rednan social, e portal aki a capta tambe un bay bin di comentario y gritonan riba e tema. Remarcable ta e cantidad grandi di persona local cu ta sostene Trump y tambe mes hopi un otro grupo cu ta sostene Biden. Pa Trump, nan ta haya cu el a haci un tremendo trabou, y e mester keda. E ta un no nonsense guy, y no ta wak su actuacion, como un problema, pasobra ta e hechonan ta conta finalmente. E grupo cu ta pro Biden, ta mustra cu por bien ta cu Biden por subi impuesto, cera frontera pa COVID, pero por lo menos e ta establece orden bek, para e division, racismo y tambe re-establece e credibilidad den e instituto di presidencia. “E ta haci e instituto ‘presidencial’ atrobe. Pues, cada uno tin nan bista.