Grupo di docente di CSN lo no sigui traha ora extra por lo pronto

ORANJESTAD – Un grupo di docente di Colegio San Nicolas (CSN) no ta bay sigui traha extra ora, pa yuda alumnonan te ora cu nan haya claridad di gobierno (lesa DPS/Minister Lampe: red) riba nan situacion. Den esaki a pidi sosten y apoyo di e mayornan, pasobra segun e presidente di sindicato SIMAR Josephine Albertus, ta pa e yiunan di nan (e alumnonan en cuestion) mes nan ta haciendo esaki. Pero nan no por wanta abusonan asina. Asina sra  Albertus a bisa Noticiacla.com diaranzon mainta. Nan a sostene e docentenan diaranzon mainta den un accion cortico, unda cu a vocifera nan opinion. Segun Albertus, e docentenan no ta wordo tuma serio pa Dienst Publieke Scholen, y a cansa di e actitud aki. 

KICO A SOSODE

Manera ta conoci, tin un grupo di docente cu ta traha mas cu 27 ora regular di trabou, pa asina por duna e alumnonan extra atencion pa cu preparacion pa nan situacion estudiantil, sigur ora cu ta trata di ayudo pa SE y examen. Problema ta cu (taba)tin un problema pa cu e pago di e oranan cu surpasa 27 ora, y esaki a bira un problema awor. For di masha tempo e sindicato ta bringando esaki y awor ta parce cu un grupo so a wordo paga e suma extra, pero aki tambe tabatin fayo. “Cierto di nan no a wordo paga mes. Ni nan oranan normal te yega 27 ora” Albertus a splica e portal. “Tin no a wordo paga, tin a wordo paga 25%, tin a wordo paga 75% pues e ta (un situacion caotico). Nan no a haya ningun overzicht, nan no sa kico a wordo paga. E oranan te ainda no a wordo aproba, kiermen ainda nan ta den incertidumbre pa e luna di November kico si (lo wordo paga) y kico no”. Segun Albertus, minister (Lampe) simplemente no kier honra e oranan extra. “Y e docentenan mester di e oranan pa por duna e muchanan e guia cu nan mester” Albertus a finalisa bisando. E potret ta di archivo di un conferencia di prensa di SIMAR.