E bataya pa presidencia Mericano ta continua awe

ORANJESTAD – E mainta despues di e eleccion presidencial na Merca, ainda no tin un ganador. Ainda e votonan ta wordo conta den algun estado. Diaranzon mainta e situacion tabata mucho cerca pa por a dicidi un ganador den por lo menos 9 estado. E estadonan cu ta den contienda ta entre otro Alaska, Arizona, North Carolina, Nevada, Wisconsin, Michigan, Maine, Georgia y Pennsylvania. Pa sea Trump of Biden gana, nan mester haya 270 voto di e colegio electoral. E situacion actual ta cu Biden tin 224 voto y Trump tin 213. 

DECLARACION TRUMP

No obstante e situacion, Trump awe mainta a reclama e victoria y a pidi pa stop e votacion pasobra lo tin fraude. Henter anochi y marduga, dos estado Michigan y Wisconsin a tene e dos candidatonan den ‘balansa’. Esey ta un ehempel con cos por cambia drasticamente. Loke ta un hecho ta cu e cambio cu democratanan a pronostica, no a materializa. 

FLORIDA

Na comienzo di e anochi, tabata cla cu Florida tabata pa Trump, un estado importante cu 4 aña prome tambe a bay pa e biyonario. E ta un estado crucial cu por mantene Trump den Cas Blanco pa 4 aña mas. Ta un hecho cu si e estado ey a bay pa Biden, cu e chens pa Biden lo tabata miho pa drenta Cas Blanco como presidente. Ta wardando e resultado di e estadonan industrial manera Pennsylvania (20 voto), Wisconsin (10) y Michigan (16) cu ta e estadonan cu a cambia di color 4 aña pasa y bay pa Trump. Ta premira e resultado di Wisconsin y Michigan awe ainda, pero Pennsylvania ta keda cla mas laat. Posiblemente diabierna. 

OTRO ESTADONAN

E otro estadonan no tabatin sorpresa unda cu tanto Trump como Biden a logra nan meta. Trump, segun pronostico, a logra Kentucky, West Virginia, South Carolina, Oklahoma, Tennessee, Alabama, Mississippi, Arkansas, Indiana, Nebraska, Louisiana, Wyoming, North Dakota, South Dakota, Kansas, Missouri, Idaho, Utah, Montana, Oklahoma, Texas, Iowa, Ohio, Florida. Cu esaki e la logra e 213 voto di e colegio electoral.  Joe Biden tambe a logra su estadonan: Vermont, Virginia, Rhode Island, New Jersey, Massachusetts, Maryland, Illinois, Delaware, Connecticut, New Mexico, New York, District of Columbia, Colorado, New Hampshire, Washington, Oregon, California, Minnesota, Hawaii, Arizona y Maine. Por lo pronto, Biden a logra asina 238 voto di colegio electoral