Gregory Elias: Corsou mester ‘step up to the plate’ pa North Sea Jazz tin continuidad

WILLEMSTAD – No tin un factor determinante pa dicidi si ta sigui cu e Curacao North Sea Jazz Festival si of no. “E unico factor determinante cu bo tin ta e bishitantenan, y en especial esnan di Aruba cu a apoya nos di un manera fantastico” ta palabra di e creador y motor principal pa 5 aña caba di e Curacao North Sea Jazz Festival, Gregory Elias na NoticiaCla.com, den un entrevista exclusivo. Esaki no ta kita afo cu segun e rapport di sr Tico Croes riba e resultado annual di e festival, Corsou mester haci mas trabou pa e festival bira uno duradero (lesa e rapport completo aki). “Mester cuminsa haya tur e partidonan beneficia di e festival (stakeholders) pa wak con nan ta bay den nan mes gremio pa wak con nan ta bay contribui pa duna e festival un bida hasta pa despues di Elias, por sigui cune”. Esey sinembargo ta algo cu Corsou internamente mester dicidi, Elias ta sigui bisa.

RAPPORT

E rapport cu ta wordo traha tur aña despues di e festival ta mustrando for di 2012 caba, cu manera añanan ta bayendo, e distancia entre e festival y e pais unda cu e festival ta tumando lugar (Corsou) , ta birando mucho grandi. “Sea bo ta haci daño na e evento, of na Corsou. Pues hendenan tin cu bay ‘step up to the plate’ pa mehora esaki” Elias ta continua.

TURISMO

E festival ta un inversion den bo pais. Den e caso aki ta trata di e sector turistico. Pero pa pensa cu e festival por genera fondo te pa bo gana placa, esaki no ta corecto. Eventonan manera e CNSJ ta meramente añadi na e producto turistico di e pais. De hecho, segun Elias ta sigura NoticiaCla.com cu gana placa te ainda e festival no a haci. “Perde so mi a perde cen. E lo no gana placa pa ningun hende tampoco. Pero e la gana placa pa Corsou si” Elias ta sigura. E cifranan den e rapport menciona, ta mustra cu den e 5 aña di e festival, Corsou a ‘gana’ 75 miyon dollar. Esaki ta entre otro na gastamento di e bishitante na Corsou durante e periodo di e festival. Foto cortesia Dick Drayer.