Minister Navarro ta anuncia medida drastico na Corsou entrante diahuebs

WILLEMSTAD – Ciudadanonan di Corsou por spera medidanan hopi drastico entrante diahuebs awor. Esey tabata e promesa di minister di husticia di Corsou Nelson Navarro durante su discurso nacional cortico na television. Motibo di e discurso tabata e tiroteo di un anochi anterior na aeropuerto di e isla, cu a laga 2 hende morto y 6 herida. Durante e discurso, e la purba delinea kico por spera ciudadanonan di Corsou.

Entre nan, cu ciudadanonan lo ripara cosnan diferente aunke no a bisa kico. “E medidanan lo afecta e privacidad di e ciudadano” Navarro a bisa. “For di mayan pueblo lo ripara cierto accionnan cu lo wordo tuma” Navarro a sigui bisa. Mes momento a duna un indicacion tambe di con largo e medidanan aki lo por ta vigente. “ E medidanan aki lo ta di awo te fin di aña” e mandatario a sigui bisa.

Mes momento e la mustra cu pueblo lo sa di biba cu esaki. “Pueblo ta fuerte” indicando cu e comunidad lo sa con pa actua. Mes momento e la sigura cu nos no ta bira un tipo di ‘politiestaat; si. “Nos ta biba den un estado di derecho” Navarro a bisa, pa sigura tur hende cu cosnan lo keda normal te cierto forma. Tambe e la duna indicacion cu pueblo lo sostene su medidanan cu lo bin. “Pueblo lo no tolera nada” e mandatario a bisa, y asina ta sigura tambe cu e tin e sosten di e comunidad.

Mesora despues di e discurso cortico, ciudadanonan a subi riba medionan social manera facebook y twitter pa cuminsa vocifera nan mes. “Mi no sa kico mi tin cu pensa di esaki” un a bisa. “Mi no ta ripara e diferencia” y “Ma kere cu e lo entrega su retiro sigur”. Otronan a mustra cu mescos cu cada caso dramatico tristo, e mesun cos di semper lo sosode. Rabia, odio, manifestacion contra violencia, vigilio y despues tur hende ta lubida atrobe. Hecho ta cu e lugar cu e asesinato a tuma lugar, ta duna e asunto un luz mucho mas diferente cu antes. Den pleno area di aeropuerto, cu ta toca e.o. turismo di e pais directamente.

Mas prome den dia, polis a divulga nombernan di esnan cu a perde nan bida.Ta trata di Erwin Adriano Juliana, naci na Corsou, 7-4-79 (conoci como Jais) y su primo Shantley Percival Arnhem, naci na Corsou 21-10-91.. ruman di Arnhem a dispidi di su familiar riba su facebook page, “RIP mijn broer en mijn neef”. Foto Nelson Navarro ta cortesia Caribisch Netwerk.