Wever: Acusacion di Jan de Ruijter contra su yiu ta basa riba mentira

ORANJESTAD – Prome minister Evelyn Wever Croes ta considera e atake contra su yiu, di ken e ta considera un ‘quasi politico’, ciudadano Jan de Ruijter como uno ‘hopi baho’. Asina el a declara durante reunion di Parlamento ora cu a trata e presupuesto supletorio. Segun Wever, e tin duele di de Ruijter, cu segun e mandatario, ta actuando manera cu el a bisa ora cu segun Wever, MEP a neng’e un contracto algun aña pasa. Mes momento Wever a bisa cu cualkier persona cu comete un acto no corecto, tin cu carga su responsabilidad y sinta riba su blaar. Hasta si ta trata su propio famia, den e caso aki su yiu. 

E KEHO

Segun Wever, e ta referi na un acusacion cu sr de Ruijter a haci algun dia pasa na e portal 24ora, acusando e yiu homber di ta e.o. reglando permiso pa e negoshi di canabees. Algo cu e mandatario a desmenti. Durante e acusacion aki, de Ruijter a indica cu Wever mes ta corupto, pero no a bin cu prueba di kico e ta corupto pues nada concreto y sin prueba, y a sigui acusa e yiu di Wever como un persona cu ta haciendo cosnan incorecto. “Ta inaceptable pa ciudadanonan ataca famia di politico na un forma baho asina. Ami personalmente ta haya esey un acto di cobardia” Wever a bisa. E politico ta Wever, y si tin algo di bisa, mester a bise na dje, e politico. Esaki segun Wever su splicacion. “Pero pa bo hinca famia aden, ta mustra cu bo ta un cobarde” Wever a bisa. 

ACUSACION

Un di e acusacionnan di de Ruijter segun Wever, ta cu e yiu homber di e prome minister ta dicidi ken ta haya tereno, cu segun Wever, ta un otro mentira. “Pasobra awor apenas algun dia mi ta encarga cu e ministerio di infrastructura. Y den e siman aki, mi no a otorga ni un tereno. Pasobra e prome decision cu mi a tuma ora cu mi a asumi e responsabilidad aki, ta cu nos ta depolitisa otorgamento di tereno” Wever a bisa. Esey kier men cu no ta e minister mas cu ta dicidi ken ta haya tereno, sino e personal capaz na e departamento, durante un proceso cu yama ‘vierogen principe’ cu ta nifica cu 2 persona hunto tin cu vigila e proceso y dicidi riba otorgamento di tereno. Mes momento e ta bisa cu tin un hende a haya tereno, lo ta di e ex minister di infrastructura. Wever sinembargo no a specifica ken e kier men, si ta ex minister Otmar Oduber of Marisol Lopez Tromp, of e minister den e gabinete anterior. 

KEHO ENTREGA

A sigura cu e yiu homber mientrastanto a hinca e asunto den man di abogado pa asina por exigi un rectificacion na e ciudadano en cuestion.