No tin fecha pa otorga plachi di number pa 2021 y no tin drive thru mas

ORANJESTAD – Ta mustra cu e aña aki, manera tabata e caso e aña anterior, cu otorgamento di number di auto (plachi) ta bay core cu retraso . Asina director di impuesto mr. Luenne Gomez Pieters a confirma den e programa Noticiacla LIVE. Tin varios motibo, pero un di nan ta e situacion financiero di pais Aruba. Gasto pa esaki ta riba mei miyon y no a haci e pagonan ainda pa por busca e numbernan. Esey ta nifica cu contrario (atrobe) na custumber cu pa December caba por paga y ricibi number, esaki lo no ta e caso. Por lo menos, no por haya e plachi, pero lo por paga si. Esey tabata e caso tambe aña pasa, unda cu por a paga pero a ricibi e plachi te luna di maart di e siguiente aña. 

KICO TA E SITUACION

Aña pasa tabatin e mesun situacion unda cu pa un eror di gobierno, no tabatin e placa na tempo cu a pone cu no por a bestel e numbernan aki na tempo. E departamento ta encarga cu cobranza di impuesto, unda cu tin cu garantiza e entrada aki, pa caha di gobierno. “Ami ta convenci cu partimento di plachi di number tabata parti di nos trabou pero, mi no ta kere cu nos tin cu sigui e forma aki” Gomez a sigui bisa. 

DRIVE THRU NO TA SIGUI

Tambe Gomez a mustra cu Drive Thru manera a conoce e aña aki, no ta sigui tampoco. Y tin un motibo pa esaki. Pa por a opera e drive thru, tabatin mester di por lo menos 40 funcionario publico riba pia, sin conta e ayudo extra (tempo) cu mester a yuda controla e plachi y controla esaki den caha pa tur siman tabatin un otro grupo. “Mi ta kere cu e forma cu nos tabata hacie, e drive thru tabatin un reactie hopi positivo, nos no mester kita afor esey, pero mi no ta convenci, ami como director di impuesto, mi no ta convenci cu esaki t’e manera” Gomez a sigui bisa. “Nos ta den deliberacion cu minister di finanzas riba e topico aki. E tambe ta mira e dolor y cu nos mester ta mucho mas eficiente” e director di impuesto a sigui bisa. 

NUMBER FIHO

E intencion ta pa bay riba un number (plachi) fiho. “Esey ta algo cu semper nos a boga p’e. Di ki forma, di ki manera esaki lo tin cu tuma lugar, mi ta kere cu ta algo cu nos lo tin cu bay bek na mesa y papie cu minister di finanzas pasobra mi no ta kere cu esaki ta e miho manera pa otorga e plachi” Gomez a finalisa bisando.