Gomez: Incumplimento pa paga plachi di number ta keda halto

ORANJESTAD – Segun cifranan mas recien di divulga pa departamento di impuesto (DIMP), 13% di e cantidad di number di auto (plachi) registra, ta paga pa 2020. Asina director di impuesto mr Luenne Gomez Pieters a bisa den e programa Noticiacla LIVE e siman aki. Un total di 73.586 number (83%) plachi a wordo paga completo, di e 88 mil cu tin registra na DIMP. Teniendo cuenta cu tur aña e cifra ta varia entre 11 pa 13% di incumplimento, e cifra ta den cuadro annual, aunke mr Gomez ta considera e cifra aki hopi halto toch.

RESTO DI CIFRA

Pa loke ta e resto di cifranan, por bisa cu tin 6.711 (8%) cu tin nada paga. Pues ni prome mitar ni full aña paga. Tambe tin 4.382 (5%) cu a paga apenas mitar aña so. Tur esaki no obstante e cantidad di oportunidadnan cu a duna, pues fuera di e termino regular, e aplazo di tempo cu a duna. Esaki a pone cu aworaki tin basta hende cu ainda ta core rond cu number di auto ‘bieu’ y cu por haya multa di polis, cu a cuminsa controla for di 1 di September ultimo. Segun mr Gomez, tin hopi keho cu di e grupo aki, pasobra segun ‘nan’, nan ta sali perhudica. Pero e realidad ta cu nan por haya nan plachi solamente segun ‘cita’ cu nan por haya si nan bay riba e portal di DIMP y haci tal.