Awe Merca ta haya su presidente nobo of mantene esun actual

WASHINGTON – Votadornan na Merca lo dicidi awe si Donald Trump ta keda presidente pa 4 aña mas of si Joe Biden ta bira e proximo presidente. Biden ta miho conoci como e vice presidente di presidente Barack Obama, pero ta politico caba desde añanan 70 pues un veterano.  Segun encuesta, Biden ta delanta cu un par di punto. Un encuesta ta un bon guia di con popular un candidato ta, pero nan no ta necesariamente bon pa pronostica e resultado di e eleccion. Por ehempel na 2016 Hillary Clinton tabata dilanti den e encuestanan y a gana e voto popular cu casi 3 miyon voto cu Donald Trump pero el a perde e eleccion debi na e sistema di colegio electoral. Pues no ta necesariamente si bo haya mayoria di voto, cu bo ta gana e eleccion. Joe Biden tabata dilanti Trump den mayoria di encuesta desde comienzo di aña. Contrario na 2016, e encuestanan tabata menos cla di ken lo a gana y Trump tabata separa cu su contrincante cu apenas algun punto dianan prome cu eleccion. 

VOTO DI COLEGIO ELECTORAL

Ambos candidato ta competi pa gana e votonan di colegio electoral. Cada estado ta haya un cantidad di voto di colegio electoral, parcialmente basa riba su poblacion, y tin un total di 538 voto. Pues esun cu gana 270 of mas, ta gana e eleccion. Esey ta nifica cu votadornan ta dicidi a base di estado, envez di nacional, cu ta posible pa gana e voto popular y ainda perde eleccion pa e colegio di voto electoral. Mayoria estado tin e regla di ganador ta gana tur cos, pues cualkier candidato cu haya e cantidad mas halto di voto, ta haya tur e votonan electoral di e colegio.

ESTADONAN Y PARTIDO 

Mayoria estado ta dominante riba un solo partido (republicano of democrata) pues e enfoke ta riba un decena di estado si nan por gana. Nan ta conoci como e estadonan di e campo di bataya.   

KEN POR VOTA

Si bo ta un ciudadano Mericano y tin 18 aña of mas, bo por vota den e eleccion, cada cuater aña. Sinembargo hopi estado a pasa ley cu ta rekeri votadornan pa mustra nan identidad prome cu nan por vota. 

E SITUACION

Tur atencion lo ta riba Trump y Biden, pero votadornan lo vota tambe pa miembronan nobo di e poder legislativo cu ta consisti di senado y e camara di representante. Hunto nan ta forma e congreso. Democratanan tin control di e Senado, pues nan lo purba mantene e control aki. Si nan tabatin control di tanto Senado y camara di Representante, nan lo por a blokea of tarda e plannan di Trump si e keda reeligi.  Tur 435 asiento den e camara ta disponibel mientras cu pa Senado, tin 33 asiento. 

RESULTADO

E por dura varios dia prome cu tur voto keda conta, pero ta hopi cla e anochi di eleccion ken ta e ganador. Na 2016, Trump a declara su mes victorioso pa 3or di marduga e siguiente dia. Sinembargo, oficialnan a alerta caba cu e biaha aki lo por dura mas dia of simannan debi na un un aumento di voto via post. Ultimo biaha cu esaki no tabata cla despues di algun ora, ta na 2000 ora cu e resultado no a keda confirma te ora cu Corte Supremo a dicta un sentencia un luna despues.