Gobierno a pidi Parlamento sosten pa yega na acuerdo cu Hulanda

ORANJESTAD – Prome minister Evelyn Wever Croes a pidi Parlamento sosten dialuna mainta pa yega na acuerdo cu Hulanda. “Mi ta spera cu Gobierno por conta cu e sosten di Parlamento den e trayecto importante aki pa cada ciudadano di nos pais” Wever a bisa. “ Ban trece trankilidad pa nos ciudadanonan cu tanto tin mester di dje, y especialmente ban crea oportunidadnan di progreso y bienestar pa un y tur. Di e forma aki nos por cuminsa reconstrui nos Pais. Aruba ta di nos tur, y ta nos mester saca Aruba padilanti” ,  Evelyn Wever - Croes a termina bisando.

REUNION MAINTA

Tabata awe mainta cu sra Wever – Croes a duna Parlamento un update di e negociacionnan cu ta andando cu Hulanda y a elabora riba e cambionan substancial cu Gobierno di Aruba a logra cu Hulanda. 

CUATER CAMBIONAN

E diferente puntonan di accion cu mester wordo encamina pa reconstrui nos economia; e asina yama landspakket, lo wordo regla den un ‘onderlinge regeling’, un acuerdo mutuo, no den e rijkswet.

Lo bin un articulo nobo cu ta stipula cu e entidad hunto cu e Minister President di e Pais lo fiha e prioridadnan di e landspakket y lo prepara e asina yama uitvoeringsagenda. Cu esaki pues ta ancra den ley cu e entidad no por dicidi riba su mes y tur cos ta bay den consulta cu e Pais.

Ta bin un areglo di evaluacion cu dentro di 3 aña cu e entidad ta existi, e comision di evaluacion lo tin dos miembro di nos Pais, y un miembro di Hulanda. A traves di e comision aki lo haci evaluacion y recomendacionnan pa si mester ahusta e rumbo di e trabounan di e entidad.

Ta bin un articulo nobo den e ley cu ta regla e curazon di tur loke nos tabata kier pa wordo regla: e autonomia di Gobierno y Parlamento ta salvaguardia. E articulo nobo aki ta stipula cu e entidad cu lo asisti nos den reconstruccion di nos Pais, lo no mina e autoridadnan ni di Parlamento ni di Gobierno. Esaki awor ta ancra den ley, y esaki nos ta considera e logro mas grandi aworaki!

EN ESPERA DI HULANDA

“Esakinan ta e cambionan cu a determina e diferencia pa asina nos acepta e condicionnan”, Prome Minister a duna di conoce enfatisando cu Gobierno ta den espera di Hulanda.

TEXTO NOBO

“Awor, nos ta en espera di e pakete di texto nobo, esaki tin poco tardanza pasobra Hulanda su team tabata concentra riba Corsou. Awe Corsou ta keda cla, y despues nos lo manda e textonan mesora pa Parlamento por tuma nota di nan y gustosamente nos ta bolbe bin Parlamento pa scucha e opinion di Parlamento riba e pakete y e cambionan, sra. Evelyn Wever - Croes a splica.

EFECTO COVID19

“COVID a dal Aruba hopi duro. E problemanan financiero cu COVID a causa e aña aki, pero tambe sigur e siguiente dos añanan, ta enorme. Realidad ta cu nos so no por sali for di e abismo cu COVID a crea, nos mester di ayudo. Den bida ta pasa cu hasta esnan mas independiente, esnan mas orguyoso, mester pidi ayudo cierto momento. Pidi ayudo no ta señal di debilidad, e ta señal di forsa, pasobra nos ta pidi e ayudo aki temporal, pa nos por sali mas fuerte di e crisis aki. Nos ta convenci cu e cambionan cu tin aworaki riba papel, lo yuda pa Aruba por sali hopi mas lihe for di e crisis aki. 

Nos lo haya asistencia, placa pa inversion, fianza na 0 porciento y pa 2 aña largo refinanciamiento lo bay ta na 0 porciento. Algo cu Gobiernonan a purba pa hopi aña pero no a logra” Wever a finaliza bisando.