Aruba Off-Road Foundation ta lamenta comportacion durante weekend

ORANJESTAD - Aruba Off-Road Foundation (AOF) a tuma nota di diferente accidente y coremento iresponsabel den weekend door di grupo nan cu a huur varios UTV pa bay off road. E comportacion aki ta wordo condena door di AOF y ta trece pa dilanti un biaha mas e importancia pa bini cu regulacion mas estricto pa e conductor nan y compania nan cu ta permiti e comportacion aki.

PETICION PA MIEMBRONAN  

AOF hunto cu su miembro nan a tuma nota di e plan pa e dia di off road aki y a urgi tur miembro cu ta den negoshi di huur pa hasi esaki cu cautela y hasta pa zorg cu tin tour guide cu e grupo pa sigura cu tur cos cana netjes. Di e manera aki por a tuma nota cu miembro nan di AOF a hasi nan best y ningun a forma parti di e actividad aki diasabra.

OFF ROAD NO SOSTENIBLE

Ta importante pa enfatisa cu e tipo di off road aki no ta sostenible. Pa es motibo AOF y su miembro nan ta sigui pidi cooperacion di parti di Gobierno di Aruba pa por yega na regulacion cu por trece un balans pa proteha naturaleza y a la vez permiti e recreacion aki den un manera segura y responsabel.