Embahador Peters: E buelo entre Manaus y Aruba ta yuda ambos turisticamente

ORANJESTAD – E hecho cu tin buelo directo entre Aruba y Manaus, ta un indicacion cu tin interes di ambos banda pa promove otro como un destinacion turistico. E embahador hulandes na Brazil, Han Peters, a splica NoticiaCla.com cu mientras cu Brazil ta un pais cu no ta pasando den su miho momentonan, e ta un reto interesante pa tin como destinacion pa Aruba. Tanto Aruba como Manaus tin interes en comun turistico y como tal e por mehora e producto di ambos banda. E presencia di Peters na Manaus awe, tabata pa mustra cu “Hulanda no solamente ta un parti Europa, pero e ta un parti di Caribe y Sur America tambe”.

Peters no ta un desconoci pa nos isla, ya cu na december e tabata na tanto Aruba como Corsou. Ta na Aruba e la tende di e buelo aki y a dicidi cu ta importante pa e tambe ta presente pa e momento importante aki, pa mustra presencia di gobierno hulandes y fortifica e lasonan mas ainda. Pa loke ta preparacion pa e buelo aki, diplomaticamente e no a nifica mucho cos pa Peters. Indicando cu Brazil no ta un pais facil, debi na su enorme burocracia, Peters tabata pendiente pa cualkier ayudo cu lo mester a bin di su banda. “Ta importante pa companianan manera Insel Air Aruba semper sa cu nan por conta cu mi sosten”.

Pa loke ta e comunidad hulandes na Brazil, Peters no por a duna un cifra exacto, pero si a confirma cu ta trata di algun mil hulandes residencia den e pais sur americano. “Tin algun pueblo hulandes tambe situa aki na Brazil, pues tin sigur un historia hulandes presente aki”. Peters mes ta staciona na Brasilia, capital di Brazil y a asumi e funcion apenas 4 luna pasa. E ta un pais hopi grandi y como tal ta rekeri pa Peters biaha relativamente hopi ‘den Brazil mes’. No obstante esey, e la sa di domina e idioma portugues di tal forma cu e por a hiba un discurso na occasion di e buelo inaugural, completamente na portugues.

E trabou principal di e embahador, ta pa proteha e interesnan economico tanto di Hulanda, Aruba como di Corsou na Brazil. E pais, manera indica caba, ta pasando door di momentonan dificil, debi cu e economia ta poco stanca. “Pero e ta keda un pais interesante y uno sigur importante pa paisnan manera sigur Aruba como St Maarten. “E cantidad di brasilero cu ta gasta placa den exterior ta grandi, y si por haya nan na tanto Aruba como St Maarten y Aruba, lo ta sigur algo positivo” Peters a finalisa bisando.