Polis a para tratamento di tur peticion pa fiesta por lo pronto

ORANJESTAD – Polis a dicidi cu ta pone un paro riba tur peticion pa permiso pa actividad di awo te fin di aña. Asina Korpschef Vanessa Tjon Kock a bisa durante un conferencia di prensa dialuna atardi. E motibo di e decision aki ta pasobra cos a bay for di man den fin di siman pa loke ta comportacion di publico. Esaki tabata durante fin di siman di celebracion di Halloween. Tiramento di boter, grupo cu ta lanta contra polis y mucho mas. 

PARO RIBA PERMISO

A dicidi como tal, cu te ora cu por mustra cu pueblo por comporta su mes mas miho segun regla cu crisis team a establece pa cu COVID19, no ta bay trata e peticion pa permisonan cu a y ta drentando pa fiestanan di awor pa fin di aña. Comerciantenan no tabata tene nan mes na horario di ciere, hendenan cu no kier a sali di e lugarnan pa por cera e lugar nan. A haci un peticion di suplica pa tur hende pa tene nan mes na e reglanan menciona. 

DI TRES WAVE

Segun Tjon, expertonan di Departamento di salud di Aruba a bisa cu Aruba ta bay haya un di tres ola (wave) di COVID19. “No ta polis ta bisa. Ta expertonan di DVG ta bisa esaki” Tjon a sigui bisa. A pidi atrobe pa tene na regla pa doñonan di negoshi, pa asina tur cos por bay manera cu e mester ta.