Corsou y Hulanda a firma e acuerdo pa traha hunto via COHO

ORANJESTAD – Casi 4 luna despues di a wordo confronta cu un proposicion CHE di Hulanda unilateral den forma di un entidad (Caribisch Hervormings Entiteit), Corsou dialuna mainta a firma e acuerdo cu Hulanda pa formalisa un otro tipo di entidad, e biaha aki yama COHO (Caribisch Orgaan voor Hervorming en Ontwikkeling). Segun secretario di estado Hulandes Raymond Knops, desde e prome fecha (10 di juli 2020), hopi cos a cambia y awor partidonan a haya otro pa por a firma e acuerdo historico aki. Mes momento el a admiti cu e presentacion na juli enberdad tabata riba un termino hopi corto y e reaccionnan cu e prome version tabata inaceptable, tabata bon comprendibel. Mes momento minister di Economia Steven Martina a desmenti di a uza e palabra colonial na inicio di e proceso. Mes momento a admiti si cu el a bisa cu e no tabata di acuerdo cu e contenido di e prome version, cu e tempo ey ainda tabata CHE. A clarifica tambe cu contrario na e proceso di e documento di CHE, cu si e documentonan bira publico, aworaki e concepto di COHO no por wordo comparti publicamente, pasobra e ley no ta permiti esaki awor. Pues ta ora cu e keda cla y ta presenta pa tanto Parlamento di Hulanda y Corsou, e ora esaki por bira publico. Critica cu tabatin si di prensa, ta cu ta papia di un era nobo, sin cu e comunidad sa e contenido di e acuerdo aki.