Polis a detene un persona cu a ‘disfraza’ na polis diasabra

ORANJESTAD – Diasabra anochi durante control di Task Force di COVID19 na altura di Yolo Bar na Palm Beach, tabatin consternacion un rato ora cu diripiente polis a presenta cu ‘un di nan mes’ den boei. Hopi no a compronde e situacion ora cu polis a trece ‘un polis’ den boei y tabata trate como un detenido comun. E persona tabatin un uniform di polis tambe, estilo di mobiele eenheid, preto cu e t-shirt y carson di polis, completo cu e emblema. Despues a resulta cu e persona aki tabata ‘impersona’ un agente policial, pa cual e la wordo deteni. Informacion inicial ta cu e persona aki lo tabata un polis cu a baha warda y a wordo haya ta bebe na bar. Algo cu despues a keda rectifica. Awe mainta vocero di polis a sigura e portal aki cu e persona en cuestion no tabata polis y cu mas bien a ‘hunga’ rol di polis. Con e persona aki a yega na e uniform y of si ta trata di un trahe bon hinca den otro, no ta conoci.