Michel Henriquez: Tabata importante pa bolbe ‘habri’ e mercado di Brazil

ORANJESTAD – Cu Insel Air Aruba , siendo un miembro activo den Aruba Trade and Industry Association (ATIA), tabata importante pa e presidente di e gremio comercial mas grandi di Aruba Michel Henriquez, sostene nan. Y e la haci esaki door di forma parti di e buelo inaugural entre Aruba y Manaus ayera. “E ta importante pa Aruba cu Insel Air Aruba a habri e ruta aki, y e obviamente e tin un importancia grandi pa comercio di Aruba” Henriquez a bisa NoticiaCla.com. Mientras cu esaki no tabata un biahe comercial, Brazil ta un pais grandi cu ‘nos tin cu habri bek”.

BISHITA ANTERIOR

Bishita Brazil no ta nada nobo pa ATIA ni Henriquez. De hecho e ta referi na un bishita comercial na Sao Paolo dos aña pasa, cu ATIA a organisa hunto cu gobierno. “Nos a bay Embraer, cu ta e fabrica di avion na Brazil. Nan tabatin un presentacion di avion unda cu Insel Air tambe tabata presente”. Y segun Henriquez, si bo trek un liña di Sao Paolo pa Aruba, Manaus ta net mei mei. “Como tal bo por mira cu esaki por ta un hub awor”. Bo mester cuminsa un caminda segun e presidente di e gremio. Insel Air su avionnan aworaki no ta yega Sao Paolo sin mas. Pero e avionan Fokker 70 cu Insel ta usando, si ta yega Manaus facil. E ciudad ta uno industrial, y tambe turistico, siendo den zona di Amazona.

FUTURO

Mester wak e buelo inaugural como un comienso y por spera mas ruta den futuro pa yega di aki pa Aruba. Henriquez ta bisa NoticiaCla.com cu antes Aruba tabata haci hopi bon negoshi cu Manaus for di tempo di Air Aruba. Pa loke ta e mission di 2 aña pasa, e tabata uno interesante y a logra basta. Pero e problema cu Brazil ta cu e ta un pais asina grandi, y su mercado interno tambe ta asina grandi. Como tal nan no ta echt enfoca riba exportacion pa un isla chikito manera Aruba. Usando su mes como ehempel, Henriquez ta conta cu a dur’e casi dos aña pa su propio negoshi por a ‘haci negoshi’ cu Brazil. Esey no ta kita afo cu tin potencial sigur pa haci negoshi. Problema tabata con e carga ta yega di un punto pa otro. E tarifa pa manda un container for di Sao Paolo, ta mas caro cu si bo sake for di China. Pero awor cu e hub directo, cu e buelo aki, e por trece mas comercio tambe, aunke cu ta carga aereo.