Taskforce di COVID19 a cera Yolo Bar pa incumplimento di protocol

PALM BEACH – Varios establecimento comercial a keda cera diasabra anochi durante control di e taskforce di COVID19. Un di nan tabata Yolo Bar na Palm Beach. Durante control di trafico, dado momento a bay Yolo Bar   pa asisti DVG y patruyanan di Noord y Strandpolitie mirando cu e publico den e establecimento no kier a sigui ordo di autoridad y e establecimento no tabata cumpli cu protocolnan di DVG. E portal aki tabata presente y a tuma nota di un gran cantidad di polis y hende cu tabata na e sitio. 

VERSION DI YOLO

Segun propietarionan di Yolo, e informacion di DVG no tabata cuadra y tur hende tabata cumpliendo nechi cu e reglanan. Tur hende cu tapaboca, sinta na bar, manera cu e reglanan tabata stipula. A sigura te hasta cu tin video cu por demostra esey y cu lo no laga e asunto te aki. A duna oido na autoridad cu a ordena pa cera e lugar ya pa 10’or, pasobra segun DVG no tabata cumpli cu e reglanan. 

DVG

Segun personal di e taskforce, nan mes a mira cu nan propio wowo, cu e lugar no tabata cumpli cu e protocol, y a pidi polis pa cera e lugar. Segun miembro di e taskforce a splica e portal aki, e musica tabata mucho duro, tabatin mucho hende aden y hopi hende no tabatin nan tapaboca bisti. Tabata suficiente motibo pa cera e lugar segun e miembro di e taskforce.