KLM ta na rand di kiebro si e no a haya placa di gobierno Hulandes

DEN HAAG – E situacion di e aerolinea Hulandes KLM ta mustra hopi malo. Diasabra gobierno Hulandes a contesta Tweede Kamer cu e aerolinea no ta haya ayudo financiero mas di estado. KLM no a logra un acuerdo cu e sindicatonan (di piloto) pa reduccion di salario y beneficio pa un periodo mas largo (5 aña). E sindicatonan di piloto y personal di tera a dicidi pa no firma e acuerdo. Cu esaki, e aerolinea no ta cumpli cu e condicion cu gobierno a pone pa e aerolinea haya mas sosten. Y sin e ayudo aki, e lunanan di e aerolinea ta parce conta. E lo no bati bancarota di un dia pa otro, pero sigur den e proximo lunanan si no logra haya placa. Y e aerolinea a sigura gobierno cu sin e ayudo, nan lo tin cu cera porta. Ta papia di por lo menos 3 pa 4 biyon di euro den 4 aña di tempo. Tur esaki debi na e crisis di coronavirus, cu a paraliza e industria di aviacion cu nan ta na punto di kiebro practicamente. Potret cortesia www.worldairlinenews.com