President di Staten ta coregi su eror anterior: mocionan declara nulo

ORANJESTAD – Diabierna atardi oficialmente pa medio di un carta na tur miembro di Parlamento, presidente di Parlamento sr. Ady Thijsen a declara cu mester considera cu e tres mocionan presenta den e reunion publico di 15 di oktober ultimo cu nan no a wordo aproba. E votamento y e resultado di votacion no ta cumpli cu e rekisito di nos Constitucion y e Reglement van Orde di Parlamento. Pa interes general prevalece y pa evita cu precedente eroneo ta wordo crea, ta declara e mocionan no valido y nulo. Dos experto riba tereno politico pero no liga politicamente a splica e portal aki cu de facto, cu e admision y e publicacion di e carta aki, sr. Thijsen mester tuma honor na su mes y retira como presidente di Parlamento. Nan ta considera esaki como un fayo garafal cu a mancha e instituto aki. E carta aki, tabata lo minimo cu e por a haci, pero no por sali ‘liber’ di e asunto aki djis cu e carta aki. Admitiendo cu awor e ta scoge pa sirbi interes general, e presidente di Parlamento indirectamente ta admiti cu su decision inicial pa pretende cu e la actua segun constitucion, tabata contra di interes general. Pesey tambe, segun e dos expertonan a splica e portal aki, lo ta interesante pa sa si partido MEP y su ministernan, cu publicamente a sostene e decision anterior di sr Thijsen, ta sali confirma cu nan tambe ta sostene interes general awor.

PRESION DI OPOSICION 

Tabata despues cu fraccion di AVP a duna presidente di Parlamento Ady Thijsen 24 ora pa ‘resolve’ e asunto di votacion di mocionnan cu e mes a declara di ta invalido, awe tardi sr. Thijsen a cumpli y a manda e carta pa tur miembro di Parlamento, anunciando cu e tres mocionan tin cu wordo considera como no acepta. Esaki pasobra tanto e votamento como e resultado di e votamento no ta cumpli cu e rekisito di decision cu absoluto mayoria conforme articulo 27 di reglamento di ordo di Parlamento di Aruba. Ora cu e deadline a vence awe mainta 8’or, AVP a actua riba esaki y a pidi audiencia cu gobernador cu e intencion di splica Gobernador di  e situacion. Den curso di dia, e carta a keda traha y manda pa e presidente di Parlamento Ady Thijsen. 

UNDA E PRESIDENTE A FAYA

Bek pa e dos expertonan di politica, nan a splica tambe cu e declaracion haci mas tempran e siman aki di e presidente di Parlamento den su conferencia di prensa, no tabata honesto debi na e hecho cu e la insisti cu su ‘interpretacion personal’ como di dje como presidente di parlamento no ta cambia. Nan ta splica cu sea bo ta retira tur cos, of bo no ta haci’e. Pero no por ta asina cu bo ta haci un declaracion, pero na banda, ta rechaza di admiti cu bo interpretacion no ta confirme Constitucion y e Reglement van Orde. Un declaracion ambiguo asina ta nifica cu no tin siguranza cu den futuro, e presidente lo actua ‘naar eer en geweten’, sino mas bien tuma un direccion cu por desvia di esaki pa ‘complace’ interes general. Y aki un presidente di Parlamento mester tin e conviccion cu e ta haciendo lo corecto, y no actua contra su ‘pensamento propio’. Lesa e carta di e presidente di Staten AKI.