Recourt: Gobierno mester cumpli cu parlamento pa geschillenregeling

ORANJESTAD – Si parlamentonan di Reino Hulandes bisa cu mester bin un ‘geschillen regeling, y cu esaki tin cu cumpli cu algun condicion, esey mester sosode. Y si bisa cu esaki mester sosode lihe, gobierno (hulandes)  mester haci esaki lihe tambe. Asina e lider di delegacion hulandes parlamentario Jeroen Recourt a declara na NoticiaCla.com recientemente. Como tal e trabou cu e delegacion hulandes a haci na Aruba siman pasa, sigur ta relevante segun e lider di e delegacion Jeroen Recourt. E pregunta ta basa riba e ‘relevancia’ di tin e tipo di reunionnan asina y ki ‘poder’ nan tin realmente. Awor e tarea pa e.o. e delegacion di Hulanda, pa loke a keda ‘palabra’, pa traspasa esaki pa gobierno hulandes y percura pa su ehecucion. No ta kita afo cu mester separa e tarea di ehecucion entre parlamento y gobierno hopi bon. Gobierno tin e tarea di ehecucion y parlamento ta esun cu ta controla.

Segun Recourt, e intencion ta pa tin un intercambio entre IPKO y e conferencianan di Reino. Cu IPKO ta e parlamentonan cu ta papia cu otro cu ta duna orden na gobierno pa nan ehecuta, y e conferencianan di Reino ta unda cu gobiernonan ta papia cu otro con tin cu sigui y con tin cu ehecuta esaki. Algo cu ,-segun Recourt-, ta funcionando hopi bon awor.

Manera ta conoci, geschillenregeling ta e topico cu mas a resalta durante e ultimo reunion di IPKO na Aruba. Ta trata di un organo cu independientemente mester atende cu posibel disputanan entre partnernan di Reino, y wak con por intermedia y soluciona esaki den un forma corecto, sin cu e ta daña e relacion entre e paisnan respectivo. Esaki a bin na discusion sigur aña pasa ora cu Aruba a drenta den un impasse cu Hulanda riba e presupuesto 2014 cu gobernador Refunjol e tempo ey a nenga di firma. Esaki a conduci na un ‘aanwijzing’ di Gobierno di Reino, cu a causa cu te cu awe ainda, e relacion entre e dos paisnan aki, no ta manera cu e mester ta. Gran parti di e paisnan den Reino Hulandes a boga e ora pa implementa un geschillenregeling, pero esaki no a haya oido serca gobierno di Reino. Awor cu e tratamento di e tema durante IPKO, lo mira si enberdad e delegacion hulandes di parlamento lo por convence gobierno di Reino cu esaki tin cu bin. For di expertonan di Reino, a compronde cu lo por dura añanan largo prome cu mira esaki, mirando cu Hulanda lo no ta dispuesto pa entrega su posicion di ‘mas poderoso’ den e caso aki.