Tur persona cu drenta Aruba via Airport mester download Aruba Health App

ORANJESTAD - Tur persona cu drenta Aruba via Airport mester download Aruba Health App. Tanto local como internacional. Den e ultimo dianan cu a pasa, e team encarga cu screening na nos Airport a tuma nota cu hopi residentenan cu ta regresa Aruba despues di un biahe, ta yega sin cu nan tin e Aruba Health App instala den nan telefoon.

Na momento cu bo persona ta regresa Aruba despues di a bay di biahe, ta importante pabo tambe tin e Aruba Health App instala. Esaki ta haci e proceso di screening y test di covid-19 mas lihe na Airport.

Pa medio di e relato aki Departamento di Salud kier informa tur persona cu ta bay biaha pa no lubida di instala e Aruba Health App. Esaki bo por haci na cualkier momento di bo biahe, no mester ta precisamente ora di regresa. Bo por haci esaki algun dia adelanta tambe.

E Aruba Health App ta necesario pa bo por ricibi bo resultado di covid-19 test haci na Airport mas rapido y eficiente posibel.