Trahadornan di AAA apoya pa FTA a entrega manifiesto

ORANJESTAD – Trahadornan di aeropuerto Reina Beatrix, a entrega un manifiesto na gobierno diahuebs atardi. Prome cu esey nan a marcha bay Bestuurskantoor. Dado momento ora cu minister no kier a bin prome y a opta pa tene un conferencia di prensa prome, e lidernan sindical a drenta Bestuurskantoor, y exigi di e seguridad di Bestuurskantoor pa mira e mandatario. A yama polis pero despues e situacion a trankilisa y e manifiesto a keda entrega.

CONTENIDO

E trahadornan den e e manifiesto a pidi gobierno pa instrui Director di Aeropuerto como tambe e “Leadership Team” completo pa di forma inmediato paraliza y pospone te na un fecha cu lo wordo determina den prome cuartal di otro aña e proceso di reorganizacion na Aeropuerto pa por entre otro:

Tin un mihor bista di e forma cu e fluho di pasahero ta desaroya durante e temporada halto cu tin nos dilanti pa asina tin un perspectiva mas realistico riba e recuperacion financiero di Aeropuerto for di e crisis actual;

Re-evalua na e momento ey e necesidad di eliminacion di cupo di trabao relaciona cu e realidad financiero-economico cu Aeropuerto ta aden;

Duna esnan cu na e momento ey nan funcion ta wordo adapta y/o cambia e oportunidad y espacio necesario pa evalua e cambionan y si ta necesario negosha esakinan cu gerencia pa asina tin un transicion trankilo na e structura nobo di Aeropuerto;

Determina si ta necesario pa reduci personal y re-negosha un pakete di compensacion cu ta adapta na e circumstancianan manera cu nan ta na e momento ey pa asina suaviza e consecuencianan di posibel Perdida di empleo;

Pa instrui Director di Aeropuerto como tambe e “Leadership Team” completo pa di forma inmediato anuncia na e empleadonan cu lo cumpli integralmente cu e instruccion di Pais Aruba y lo pospone e proceso di reorganizacion te na momento cu re-evalua esaki den e prome cuartal di 2021. Esaki pa calma di una vez e situacion di ansha y desespero cu ta reina bou di e empleadonan cu ta wordo presiona di forma diario pa acepta cambio di funcion of retiro;

Pa den caso cu Director di Aeropuerto y/o e “Leadership Team” una vez mas nenga di cumpli cu e instruccion di Pais Aruba, tuma di forma inmediato e pasonan necesario pa destitui gerencia di Aeropuerto y instala un equipo nobo cu si ta dispuesto pa tuma decisionnan cu ta den beneficio di TUR esnan envolvi conforme instruccion di Pais Aruba como unico accionista.