Aeropuerto lo no retira ningun hende obligatoriamente mas pa 2020

ORANJESTAD – Di awor pa resto di aña, aeropuerto di Aruba no ta retira ningun trahado mas di forma obligatorio. Asina minister di Turismo responsabel pa Aeropuerto, Dangui Oduber a participa diahuebs atardi durante un conferencia di prensa. E decision menciona, a keda confirma diahuebs mainta. Mientrastanto, trahadornan di aeropuerto y nan sindicato FTA a dicidi di drenta Bestuurskantoor, y exigi presencia di e mandatario. Dado momento nan a clash cu e agentenan di seguridad, pa cual mester a yama polis. 

E ACUERDO LOGRA 

Pa loke ta e acuerdo, sr. Oduber a bisa concretamente cu a palabra cu ta bay ofrece un pakete di retiro voluntario, na esnan riba 55 aña di edad. E deadline pa dicidi riba e pakete a wordo hala di 30 di October 2020 pa 8 di November proximo, pa asina tin mas tempo pa pensa riba esaki. A tuma e decision tambe cu ningun trahado lo wordo retira obligatoriamente e aña aki mas. Gerencia no ta bay pidi disolvimento di contracto via corte den 2020. Y na januari 2021 lo haci un re-evaluacion di e situacion financiero di aeropuerto, sr. Oduber a sigui bisa.