Gobierno a traspasa California Lighthouse na Stichting Monumenten Fonds

ORANJESTAD - Despues di 100 aña di existencia gobierno di Aruba a traspasa California Lighthouse na Stichting Monumenten Fonds . Minister di Cultura Otmar Oduber a haci traspaso di ‘California Lighthouse’ na Stichting Monumenten Fonds (SMF) cu lo bay percura pa e restauracion, expansion y mantencion di e monumento aki. Esaki tabata sigur un momento hopi special, caminda cu ta exactamente despues di 100 aña , e  aña aki, cu e Lighthouse a wordo traha. Oduber a indica cu despues di basta conversacion , pa cual e mandatario a  cuminsa na gradici colega Minister di Infrastructura , Sr. Benny Sevinger, finalmente e propiedad aki oficialmente ta wordo traspasa. A haci entrega simbolicamente di e yabi na Sr. Rolly Sint Jago, kende a acepta esaki na nomber di Monumenten Fonds.

E intencion awor aki ta pa, mirando cu tin e fondonan disponibel , e compromiso tey y e plannan ta cla,  por cuminsa cu e reconstruccion , renovacion y ampliacion  di loke ta trata California Lighthouse. Ta hopi importante pa e restauracion aki tuma lugar, mirando cu por ehempel departamentonan manera un APA,  cu tambe tin un luz ey riba, por haci uso di esaki bek manera cu mester ta.