Premier Rhuggenaath ta cla pa firma acuerdo na Hulanda

DEN HAAG – Prome minister di Corsou Eugene Rhuggenaath a yega Hulanda diaranson pa atende e.o. cu e reunion di Rijksminister Raad (RMR) cu ta tuma lugar diabierna awor na Hulanda. Esaki debi cu e proposicion di Hulanda pa cu continuacion di ayudo financiero, ta riba agenda pa wordo trata. E intencion ta pa RMR dicidi diabierna si Corsou a cumpli cu tur rekisito, y cu Corsou a bay di acuerdo cu e proposicion di Hulanda pa nan firma esaki. Unabez cu e keda firma, Corsou ta haya e placa for di Hulanda. E siman aki Gobierno di Hulanda a informa Corsou  ( y consecuentemente e otro islanan Aruba y St Maarten) di e ultimo ‘draft’ di e acuerdo, pa asina tur hende ta riba e mesun liña, y prepara pa esaki. Aruba mientrastanto a bisa caba cu nan, contrario na Corsou, no ta cla ainda y falta algun punto pa keda concretisa pa e ora nan tambe por firma cu Hulanda. Ta premira cu esaki por sosode mas sigur pa e proximo reunion di RMR cu ta mitar di November proximo. Potret cortesia premier Rhuggenaath.