Falta 1 siman so mas pa Pinta & Kleur bo mascota favorito

ORANJESTAD - E comision cu ta bezig cu e Concurso di Pinta y Kleur a wordo agradablemente sorprendi cu e noticia cu un cierto cantidad di nos muchanan den 3e klas a keda desapunta cu e aña aki nan grupo di edad - mas cu 8 aña - a wordo laga afo for di e Concurso. Pero esaki no ta e caso! Mescos cu aña pasa pa e Concurso di Pintamento cu tabata pa muchanan di 6 pa 12 aña, un excepcion a wordo haci pa muchanan cu ta riba 12 aña y ta den 6e ainda. Mescos e aña aki; muchanan cu ta riba 8 aña pero ta den 3e ainda por participa! Nan mester percura pa skirbi nan edad, nan skol y nan klas riba e formulario di participacion pa si en caso e comision kier verifica cu skol cu realmente e alumna of alumno ta den 3e klas. E comision ta spera cu e noticia aki haci tur muchanan contento y kier encurasha nan tur pa participa. Tambe e comision kier recorda tur participante cu tin solamente 8 dia mas pa keda cla cu bo arte di kleur y pinta bo mascota favorito. Ultimo dia pa entrega esaki ta dia 5 di November 2020. Por entrega un scan di esaki via email (specialprojectsaruba@gmail.com). Tambe por hiba e arte na e siguiente localidadnan: tur MFA (Noord, Paradera, Santa Cruz y Savaneta), e oficina di gobierno Edison Briesen na San Nicolas, Aruba Animal Shelter y e Centro di Control di Cacho na Wayaca, y tambe Bestial y Do It Center na Shaba.

Participacion ta gratis. Bo tin algun dia so mas. Bo tambe kier participa?